КӦИН ДА МЕГӦ

Веж турун пӧвстын шургӧ-больгӧ шор.
Сэн ичӧт Мегӧ кутіс юны
Да бурӧн сэтысь кок эз вермы нуны.
Со кутшӧм сыкӧд лои омӧльтор.
Код тӧдас кысь, руд Кӧин сэтчӧ воис:
Син би кодь югыд, вомсьыс петӧ быг.
Кӧть тӧрыт на дзонь ыжӧс сійӧ сёйис,
Да талун бара вӧлі тшыг.
Оз вӧрзьы Мегӧ, ёнджыка на раммӧ.
Руд Кӧин кучик кульны сяммӧ,
Да мед оз шуны: «Кӧиныд пӧ — шыш»,
Пыр корсис сійӧ Мегӧыслысь мыж.
«Тэ мыйла, — шуӧ, — менам юанінӧ
Пеж кокнад пыран, сюян сэтчӧ ныр?
Став шорыс няйтӧн лои тыр!
Тэ, гашкӧ, чайтан: мыжыд тэнад мынӧ?
Да тайӧ, зонмӧ, абу мынантор,
Кор тадзи гудыртӧма шор!»
— «Сё муса кӧин, — Мегӧ лысьтіс шуны: — 
Ва катчӧс тэлань гудырыс оз кай.
Тэ меысь вылын. Позьӧ тэныд юны
Сӧдз васӧ ассьыд пай!»
— «Мый кыла ме? Мый синмӧй менам аддзӧ?
Тэ мекӧд ещӧ вензян, мисьтӧм Меж,
Дай нерсигтырйи легӧ тэнад бӧж!
Тэ колян гожӧм волӧмыд нин татчӧ
Мем лёксӧ вӧчны: баксін тані дыр
Дай менӧ пинялін лунтыр!»
— «Кыдз эськӧ сэки волыны ме кужи:
Ме, муса Кӧин, неважӧн на чужи!»
— «Сідз, гашкӧ, воліс тэнад ыджыд вок?
Дзик тэлӧн кодь и вӧлі сылӧн кок!»
— «Ме ӧтка пи!» — том Мегӧ бара шуӧ.
— «Сідз, гашкӧ, воліс тэнад пӧрысь бать,
Да эз кӧ батьыд, гашкӧ, зять?
Ті ставныд кӧсъяд сюйны менӧ гуӧ.
Тадз, зонмӧ, уджавны оз ков.
Ме тэкӧд лыддьыся, ме босьта тэнсьыд лов!»
— «Сё муса Кӧин, мыйӧн нӧ ме мыжа?»
— «Ме тэ вылӧ став грексӧ налысь гижа! — 
Руд Кӧин горзӧ. — Кутшӧм меным мог
Тан тӧдмавлыны тэнсьыд оланног!
Ме сідз нин аддза, коді кыдзи олӧ.
Тэ сійӧн мыжа: сёйны меным колӧ!»
Тадз шуис Кӧин, восьтіс паськыд вом
Да вӧчис Мегӧыслы пом.
...Дерт, ичӧтыд кӧ абу лэчыд гыжа,
Пыр сійӧ ыджыд водзын мыжа.