КОР КРЕСТЬЯНИНЛӦН БЫРӦ ПРАВА МУӦН ВӦДИТЧӦМ ВЫЛӦ

Права крестьянинлӧн муӧн вӧдитчӧм вылӧ бырӧ, сійӧ кӧ став семьянас ас окотанас муяссьыс ӧткажитчас. Оз кӧ став семьяыс ӧткажитчы муяснас пӧльзуйтчӧмысь, мукӧдыслы муыс кольсьӧ асланыс нормаыс.

Куим во кӧ помся муяссӧ крестьяниныс вермис да эз уджав, праваыс муӧн вӧдитчӧм вылӧ сылӧн бырӧ жӧ. Сэки вӧлӧсьтувса видз-му комиссия вермас сійӧ крестьяниныслысь босьтлыны муяссӧ ӧти перемена кежлӧ (на один севооборот). Сылӧн кӧ уджавтӧгыс муыс олас куим восьыс дыр, сэки вӧлӧсьтувса видз-му комиссия вермас муяссӧ дзикӧдз босьтны.

Сэсся праваыс муяс вылӧ вермас вошны, мунас кӧ крестьяниныс семьянас кытчӧкӧ дзикӧдз выль местаӧ. Выль местаӧ мунысь йӧзыс важ оланінас ас саяс вермасны муяссӧ кольны кык во кежлӧ, а Видз-му Комиссариатлысь юасьӧмӧн да корӧмӧн — куим во кежлӧ. Сійӧ кык-куим вонас выль местаӧ мунысь йӧз вермасны муяссӧ сетавны арендаӧ. Сӧмын сійӧ кадас кӧ самӧй (кык-куим восьыс водзджык) земельнӧй обществоас кутас мунны землеустройство, сэк выль местаӧ мунысьяслӧн праваыс муяс вылас вошӧ. Кодъяскӧ кӧ вузаласны муяссӧ, ньӧбасны, завещанньӧӧн кӧсйысясны, пӧдаритасны, залог улӧ босьтасны либӧ сетасны — налӧн муясыс босьтсьӧ жӧ. Суд сэк налысь правасӧ му вӧдитӧм вылӧ босьтӧ.