МЫЙ КОЛӦ ВӦЧНЫ КРЕСТЬЯНКАЛЫ АСЛАС НЫВБАБА ПРАЗДНИК ЛУНӦ
Матысмӧ ставмувывса нывбаба праздник — март 8-ӧд лун. Тайӧ луннас нывбабаяс петкӧдлӧны ассьыныс ӧтувтчӧмсӧ, вынсӧ. Миян коми аньяслы тайӧ луннас колӧ жӧ петкӧдлыны ассьыныс уджсӧ, ӧтувтчӧмсӧ, вынсӧ. Нывбаба праздник оз празднуйтны торъя гажъясӧн, тайӧ луннас туйдӧдӧны уджалысь нывбабаясӧс водзӧ уджӧ: мый налы колӧ вӧчны маті кадӧ. Тавося нывбаба праздник лунӧ колӧ туйдӧдны бурмӧдны олӧм миян челядьлысь.
Коми челядьлӧн олӧмыс зэв омӧль, некодлы видзӧдны на бӧрысь, няйтӧсь, киссьӧм паськӧмаӧсь, кынмалӧны, доймалӧны.... Мамъяслӧн висьӧ сьӧлӧмыс на понда, сӧмын коньӧр аньлы некор на борысь видзӧдны. Сылӧн уджыс юр выв тырыс, лоӧ уджавны быдпӧлӧс удж, водзсасьны абутӧмкӧд. Быд тӧв унджык коми аньыс кольӧ тӧв кежлӧ ӧтнас, мужикыс мунӧ корсьны нажӧтка. Челядь лунысь-лун ӧтнаныс, ичӧт видзыськӧд либӧ муртса вӧрысь пӧчӧкӧд. Гожӧмын коми аньлӧн да челядьлӧн олӧмыс ещӧ нин омӧль. Коми ань спокой оз аддзыв, лун уджалӧ видз вылын, а гортас воас да, сэні уджыс ещӧ уна. Мӧсла колӧ котӧртны вӧрӧ, челядь бӧрдӧны, некор найӧс вердыштны, шойччӧмыд оз и сюрлы. Челядь ёна мучитчӧны гожӧмын ичӧт видзысьяскӧд. Омӧля видзӧмла ёна миян кулӧны гожӧмын кагаяс.
Нывбаба праздник дырйи колӧ коми аньяслы мӧвпыштны, чукӧртчывны да сёрнитны, кыдзи кокньыдджыка петны татшӧм сьӧкыд олӧмсьыс.
Лӧсьӧдны челядь видзанінъяс, яслияс, площадкаяс. Татшӧм яслияс позьӧ лӧсьӧдны быд сиктын, сӧмын колӧ аслыныс бабаяслы кутчысьны тайӧ уджас, мездыны асьсӧ нэмӧвӧйся чепъясысь. Ясли видзӧм сувтас донтӧгджык кага видзысьӧс медалӧмысь. Ӧні миян быд кагалы лӧсьӧдӧны торъя видзысь гожӧм кежлӧ, яслиын ӧти видзысьыс видзас вит, квайт и унджык кага.
Коми ань! кутчысь сьӧлӧмсяньыд тайӧ уджӧ, шыбит ас вывсьыд лишнӧй шог. Кор тэнад кагаыд лоӧ яслиын, а гырысьджык челядьыд площадкаын, сӧмын сэки тэнад сьӧлӧмыд лоӧ местаын, сэки тэ бура верман уджавны ассьыд уджтӧ. Оз ков сэк повны челядь доймӧмысь, сӧмын лӧсьӧдалӧй яслиад бур видзысьясӧс. Тайӧ нывбаба праздник лунӧ чукӧртчӧй, сёрнитӧй яслияс лӧсьӧдӧм йылысь, мед тайӧ гожӧм лоӧ быд сиктын челядь видзанін! Уджалысь коми аньяс, энӧ некор вунӧдӧй, мый тіян омӧль олӧмыс — асланыд удж!
Обласьтувса нывбаба костын удж нуӧданін.
