МЕД ОЗ ЛО ВОЙНА — КОЛӦ ЁНМӦДНЫ КРАСНӦЙ АРМИЯ

Тайӧ воясӧ миян СССР-ын вывті ӧдйӧ кыптіс промышленносьт, паськалі сельскӧй кӧзяйство. Тшыгъялан, тӧвартӧм кад коли нин бӧрӧ.

Сідзжӧ тайӧ воясӧ ёна содіс мукӧд государствояскӧд тӧргуйтӧм. Сӧвет Союзӧс признайтісны нин став гырысь государствоясыс Америка кындзи. Зэв эськӧ уна капиталистъяс зільӧны омӧльтчӧдны СССР-ӧс, да сӧмын нинӧм оз вермыны вӧчнысӧ. Миян правительство нуӧдӧ веськыд политика — зільӧ овны быдӧнкӧд мирӧн.

Сӧмын оз на позь шуны, мый войнаыс оз ло некор. Ӧнӧдз кӧ эз вӧв война, оз на позь шуны — оз пӧ ло сійӧ водзын. Капиталистъяс пыр корсьӧны стрӧка уськӧдчыны миян вылӧ. Ассьыным кӧзяйствоӧс лӧсьӧдігӧн, паськӧдігӧн миянлы некор оз ков вунӧдны та йылысь. Капиталистъяслӧн да Сӧвет Союзъяслӧн туйясыс абу ӧткодьӧсь, найӧ мӧда-мӧдыслы ёна мешайтӧны. Капиталистъяс видзӧдӧны миян вылӧ кыдзи медыджыд врагъяс вылӧ. Найӧ тӧдӧны — рабочӧй да крестьяна мукӧд государствоясысь миян вылӧ видзӧдӧмӧн велӧдчӧны шыбитны, мездысьны капиталистъясысь.

Сӧвет Союз вылӧ войнаӧн уськӧдчӧм абу дзик прӧстӧй сёрни. Став капиталист государствояс война вылӧ ёна лӧсьӧдчӧны. 1913ʼ воын гырысьджык государствоясас вӧлі 5 миллион да 759 сюрс салдат, 1925 воын — 5 миллион да 232 сюрс салдат. Тайӧ кадас (1913 восянь 1925 воӧдз) Германияын, Австрияын, Венгрияын да СССР-ын армияясыс чиніны 1 миллион да 710 сюрс салдатӧн. Сідзкӧ Англияын, Францияын, Италияын, Польшаын, Румынияын да мукӧд посни государствоясас армиясӧ ыдждӧдӧмаӧсь 1 миллион да 183 сюрс салдатӧн.

Сэсся босьтам водзӧ. 1910 воын Россияын, Англияын, Германияын, Францияын, Австрияын да Венгрияын военнӧй рӧскодыс быд душ олысь вылӧ вӧлі усьӧ 10 шайтӧн. 1925-воын СССР-ын военнӧй рӧскод быд душ олысь вылӧ воӧ сӧмын 3 шайт, Польшаын — 11 шайт, Францияын — 14 шайт. Та бӧрын нӧ мый позьӧ шуны? — Со мый. Капиталист государствоясын содӧ армияяс, военнӧй рӧскод кайӧ, содӧ быдпӧлӧс оружйӧ — быд ногыс лӧсьӧдчӧны война вылӧ.

Код вылӧ нӧ вермасны войнанас муннысӧ? Дерт, медвойдӧр СССР вылӧ.

Кутшӧм нӧ ӧні колӧ лоны та серти миян уджыс? Сӧвет Союзлы колӧ и водзӧ кежлӧ важ политикасӧ нуӧдны — мирӧн овны. Миянлы война оз ков. Ми кӧсъям овмӧс кыпӧдны, уджавны. Но миян вылӧ кӧ кӧсйӧны уськӧдчыны, миянлы колӧ лӧсьӧдчыны водзсасьны. Краснӧй армия, морскӧй да воздушнӧй флотъяс кӧ лоӧны миян ёнӧсь, капиталистъяс дзик кокньыда миян вылӧ уськӧдчыны оз лысьтны. Да кӧть сэки и уськӧдчасны, пиньяссӧ ассьыныс чегъяласны гражданскӧй война дырйи моз.

Коммунист партиялӧн 14-ӧд съездыс шуис: кыдз-мый вермам ёнмӧдны Краснӧй армия, морскӧй да воздушнӧй флот. Тайӧ шуӧмыс зэв колантор.

Ми огӧ кӧсйӧ косясьны. А мед миян вылӧ оз уськӧдчыны, миянлы колӧ ёнмӧдны Краснӧй армия да флот.