БУРМӦДАМ КООПЕРАТИВ ПЫР ВУЗАСЬӦМ-НЬӦБАСЬӦМ!

Февраль 10-ӧд лунын воссис Сыктывдінкарын 5-ӧд обласьтувса потребительскӧй обществоясса уполномоченнӧйяслӧн собранньӧ.

Кольӧм восянь потребительскӧй обществояслӧн уналаын уджыс ёнмис, лавкаяс паськалісны, ньӧбасьысьяслы вермыны кутісны сетны колана тӧвар. Кольӧм во (1924) январ кежлӧ вӧлі 88 потребительскӧй общество, 92 лавка, а таво лыдыс потребительскӧй обществояслӧн соді 116-ӧдз, лавкаяс — 156-ӧдз. Шленъяс воысь воӧ содӧны; колян во вӧлі потребительскӧй обществоясын 10.400 шлен, таво — 20.600 шлен нин. Ӧні 100 керка юр пытшкысь 56 керка юр кооперативын нин. Содіс лыдыс кооперативъясын и нывбаба шленъяслӧн: колян во вӧлі 300 нывбаба шлен, таво — 2700 шлен.

Медыджыд бурыс во чӧжӧн усьӧ кооперативъяслӧн ас сьӧм содӧм вылӧ; кооперативъяс босьтісны куш прибыльсӧ 110 сюрс шайт. Став эмбурыс кооперативъяслӧн лыддьыссьӧ 1.256 сюрс шайт дон, сӧмын сійӧ эмбурсьыс коймӧд пайыс кооперативъясыслӧн. Мӧдарсяньыс, кооперативъясыслы унаӧн на крестьяна пытшсьыс уджаӧсь. Татысянь заводитчӧ кооперативъяслӧн омӧльыс.

Кооперативъяслы колӧ заптысьны тӧварӧн, колӧ налы ньӧбны ӧтпырйӧ уна тӧвар, сэк колӧ налы уна сьӧм, а сьӧмсӧ разӧдӧма; Обсоюз пыр уджӧн тӧварсӧ сетны оз вермы, сылы аслыс колӧ сьӧм вылӧ ньӧбасьны.

Кооператив вермас бура уджавны, кор сылӧн эм аслас кассаас сьӧм; сэк позьӧ шуны: кооператив бур. Ӧні кооперативъяслӧн капиталыс джынсяыс этшаджык бергалӧ вузасьӧм-ньӧбасьӧмын.

Кооперативъяслӧн ёнмӧдчан туйыс ӧтик: колӧ кыдз верман ыдждӧдны капиталсӧ, мынтысьны уджйӧзъясысь. Кыдзи позьӧ тайӧс вӧчны? Уна на ӧні эм кооперативӧ тырӧдз пай сеттӧм шленъяс, мынтасны кӧ ставыс тырӧдз пайсӧ да кооперативъяслы уджйӧза крестьянаыс кӧ мынтасны уджйӧзъяссӧ, сэки и содас кооперативса кассаын сьӧм. Та йылысь уполномоченнӧйяслӧн обласьтувса собранньӧ сетас кооперативъяслы бур индӧдъяс.

Эм ещӧ кооперативъяслӧн зэв ыджыд омӧльтор — эмбур лотайтӧм. Оз, дерт, Сӧвет власьт ошкы таысь некодӧс. Ӧні уна лотайтысьясӧс ёна мыждісны, сӧмын кутасны кӧ став шленъясыс асьныс индавны лотайтысьяссӧ, воас регыдджык талы пом. Сэсся колӧ лотайтӧмысь ревизионнӧй комиссияяссӧ асьнысӧ мыждыны, найӧс пуктӧмаӧсь, мед бура видзӧдісны кооперативса удж бӧрысь; оз кӧ аддзыны омӧльторъяссӧ, мед и лэптасны ас выланыс мыжсӧ.

Шуасьӧмъяс — первой на пӧ шленлӧн либӧ приказчиклӧн лотайтӧмыс, уна пӧ челядьыс сылӧн, бур пӧ сійӧ удж нуӧдысь да мукӧд сэтшӧмтор — колӧ дзикӧдз бырӧдны. Небыда кӧ босьтчам лотайтысьяс бердӧ, лотайтӧм оз кус.

5-ӧд собранньӧ оз вунӧд та йылысь сёрни, колӧ сӧмын быдӧнлы зіля кутчысьны лотайтӧм бырӧдӧм уджӧ.

5-ӧд обласьтувса потребительскӧй кооперативъясса уполномоченнӧйяслӧн собранньӧ индас туй кооперативъяслы кыптыны!

Босьтчам ставным 5-ӧд обласьтувса Сӧветъяс съезд да 7-ӧд партия конференция шуӧмъяс серти ёнмӧдны да бурмӧдны кооператив пыр ньӧбасьӧм-вузасьӧм!