КЫВЗӦЙ!

Веськыда, чорыда коми дор мунӧй!
Пемыдысь, сьӧкыдысь лапниттӧг син,
Югыдсӧ, бурлунсӧ комилы нуӧй,
Мырсьӧмас, ноксьӧмас содтыштӧй вын.

Повтӧга, збойджыка сюсьлунӧн петӧй.
Пемлунлысь орйӧдлӧй йӧз дзуган вез.
Асьнытӧ, ловнытӧ ас йӧзлы сетӧй,
Вежӧрнас палялас корсьны мед мез.

Тувччыштӧй, тшупыштӧй водзӧ пыр, водзӧ.
Жалиттӧг асьнытӧ петӧй жӧ ті.
Югыдлун, шудалун комилы вӧчӧй,
Коммуӧ ӧзъяс мед куслытӧм би.

Вежӧртӧ ассьыныд эн сотӧй зелляӧн.
Ас туйӧ мунігӧн лоӧ кыдз шӧрт.
Пемлуныд сетчас ачыс ас вӧляӧн,
Оз ковмы сы вылӧ дорны сталь кӧрт.

Сьӧлӧмшӧр ёртъясӧй, кывзӧй жӧ ещӧ!
Кывныд мед ас йӧзлы оз вай жӧ пеж:
Шуан ӧд этша да уна зэв вӧчӧ.
Лёкысь да пакӧсьтысь бокӧджык кеж.

Раммӧмӧн меліа йӧз дінӧ петӧй,
Сёрнитӧ нуӧдӧй, мед гӧгӧр шыль.
Вежӧрман бур кывсӧ унджык жӧ сетӧй,
Тӧдасны медым — мый важ да мый выль.

Тшаплунӧн, кидлунӧн петны эн лысьтӧй:
Сэки ӧд йӧзыс тшӧтш лоӧ жӧ кид.
Сибыдӧн кывворӧн туйнытӧ восьтӧй — 
Аддзанныд йӧз костысь оласног быд.

Сьӧлӧмтӧ ассьыныд йӧз дінӧ йитӧй,
Йӧз костысь кывзӧй ті мый петӧ шы,
Бурыс мый выйим ті босьтӧй да кутӧй,
Пестӧй да ломзьӧдӧй гӧль коми кыв.