КОР БЫРӦ ЛЁК ОЛӦМ

Медым йӧзлӧн садьыс воссяс,
Медым йӧзыд лоас сюсь,
Лун колляла — на дор песся,
Рыт пукала, вой ог узь.

Медым эськӧ йӧзыд садьмис,
Медым пышйис сылӧн ун,
Вынйӧр пукта — ог нин мездысь,
Медым содӧ йӧзлӧн вын.

Медым йӧзлӧн збойлун содӧ,
Медым ас дор лэдзны шы,
Кыдзи колӧ, кытчӧ тӧдӧ,
Путьтӧг-сямтӧг мед оз гы.

Медым йӧзлӧн олӧм бурмас,
Медым ставлы лоӧ шуд,
Пемыдлунсӧ ёрӧй юрнас — 
Югыдланьӧ, коми, сувт!

Медым синва киссьӧм дугдас,
Медым кусӧ лёксьӧм, шог!
Югыдлань кӧ быд морт петас — 
Бырӧ ставыс, муса вок!