ВӦЛӦСТНӦЙ ПИСАР (Важ олӧм йылысь)Ок тэ, писар — коньӧр морт, Быд лун мырсьы — гиж да сёрт: Воас Выльлун — гиж да гиж... Чужӧм вылад дзик нин виж. Дай Воторник корӧ вын — Лунтыр сёйнытӧ он мын; Йӧзӧн Правленньӧыд тыр — Гижан Середаӧ дыр. Сідз жӧ Четвергӧ он узь — Луныд, коньӧрлы, зэв кузь; Сюрӧ Пекничаӧ пай — Быдӧн шуӧ: «Билет вай!» Уджтӧг Субӧта оз коль: Гижан, зяткан тшӧтки моль; Вӧскресенньӧыд оз вун — Ковмас пессьыны кузь лун. Со и Выльлун локтіс мӧд, А тэ шойччӧгтӧ он тӧд. Уна тэ вылын эм бать — Горзӧ обществоыд — «мать!» Йӧзыд водзын быттьӧ пон — Некод оз шу: «Верман он?». «Мирскӧй казак» тэнад ним... Быдӧн сувтӧдӧма син... Бурӧ некодлы он во, Кӧть тэ мырсьы кымын во. Локтас Земскӧй — аддзӧ мыж, — Тэ пӧ делӧ вылад «ныж»... Пасъяс козин тэныд — штрап... Сылы кок вылас тэ — крап!.. — «Благороди, сідз эн вӧч — Тайӧ сьӧмас кисьті пӧсь»... Локтас Пристав — зэв он жы, Мед оз кывлы коклысь шы, Дай Урадник водзын пов... Нэмыд топыдінын ов. Лоан пӧрысь — «тэ пӧ шӧть!» Быдӧн кутны кӧсйӧ «тшӧть». Сэки он ков, сӧмын — пет, Тэнад семья тшыг кӧть пӧт... Ок тэ, писар — коньӧр морт, Тэнад матын гу да горт... ...Со кыдз важӧн, муса пи, Овлім писар чукӧр — ми.
