КОММУНИСТЛӦН КУЛӦМ БӦРЫН ОЛӦМЫС

(Сьӧлӧмсянь сиа тайӧс Нёбдінса Витторлы — коми юмористлы).

Коркӧ, ёна висьӧм бӧрын,
Гашкӧ, самӧй сьӧд вой шӧрын,
Кулі Симӧ Петыр пи;
Кулі ачыс — йӧз эз ви.
Сійӧ пыр жӧ мӧдіс райӧ...
Зэв кузь поскӧд вывлань кайӧ...
Коркӧ-й послӧн воис пом,
Воис райлӧн гажа дом.
Сэні кильчӧ калич помын
Ыджыд, ыджыд колькъя томан:
Пырны водзӧ дзик оз позь — 
Сэні абу весиг розь.
Коркӧ-й воис Петыр-Павел.
Шуис: «Ак тэ, Мишка, дявӧл!
Тэ кӧ вӧлін коммунист — 
Тэнад душаыд нечист!...
Тэныд райын оз позь овны — 
Менам гӧтыр кутас повны...
Тэнад грека лолыд пеж...
Ӧдзӧс шӧрсьыс вешйы! Кеж!»...
Миша весиг кыв-мӧд шуны
Эз и вермы, лои мунны;
Эз и аддзыв ӧдзӧс сай,
Кутшӧм сэні гажа рай.
Мӧдіс бӧрлань. Сэн, неылын,
Райӧ каян кузь пос вылын,
Паныд лои тӧдса морт.
Мышкас сылӧн святӧй борд.
Мишка шуис: «Тэ, Великӧй!...
Ме ӧд дзикӧдз вои пикӧ...
Менам делӧ лои дзуг...
Кыдзкӧ мезды, Стёпа друг!
Нэм чӧж гӧлькӧд ӧтув овлі — 
Найӧ пемыдысь эг повлы...
Кыдзкӧ инды меным туй...
Тэ ӧд верман... Райӧ сюй!»...
Сэк Степан Великӧй шоча
Шуӧ Симӧ Мишлы воча:
«Ак тэ, вӧрса, большевик!...
Лысьтан вежны святӧй лик?!
Тэ и тшыг йӧз дорыс олін?
Сідзкӧ тэ и коркӧ волін
Кульны менсьым эзысь пась?...
Бур кӧ колӧ — весась тась!...
Тшыгъялысьӧс вокӧн лыддян...
Налы тэ и гачӧс мырддян!...
Кутшӧм, зонмӧ, зырымбедь...
Райӧ лэдзӧм пыдди — плеть!...
Локтӧма зон... Другӧ висьтав...
Босьта да со пиньтӧ кисьта!...
Кытчӧдз ризі бӧр он сет,
Сэтчӧдз... тю-тю... Пет вай!... Пет!»
Сэсянь Мишка мӧдіс адӧ.
Мунӧ дыр нин, мунӧ рада — 
Гашкӧ, дінас босьтас чӧрт:
Лоӧ шоныд... Сэн сир пӧрт...
Коркӧ-й воис ӧдзӧс дорӧ,
Кутіс гольӧдчыны гора...
Воссис ӧдзӧс, зиль да зёль...
Петіс дядьӧ, дзик сьӧд — смоль.
Мишка пырис. Мӧдіс водзӧ...
Регыд воис ыджыд водзӧ...
Сэні Гурей Васька эм,
Юда ордысь удждӧ сьӧм...
Шуис ыджыд: «Кывзы, Мишка,
Адын йӧзыс сідз нин лишка...
Коммунистысь оз ло бур:
Регыд чегад менсьым сюр...
Со ӧд шызьны кутіс татӧн — 
Революция нин матын...
Кытысь локтін, мун жӧ бӧр — 
Адын овны тэ он тӧр!»
Райысь вӧтліс Петыр-Павел,
Ыстіс адысь сюра дявӧл:
Мишка некытчӧ эз ин...
Зонмӧ, коммунистлӧн чин!..
Мӧдіс бӧрлань Межадорӧ:
Кыті вӧрӧд, кыті шорӧд...
Со и вуджис Сыктыв ю...
Воис аслас свежӧй гу.
Кутіс овны гуыс вылын — 
Мунны гортӧдз абу ылын.
Кутіс грездӧ мунны пыр;
Мукӧддырйи ветлас дыр...
Ӧтчыд Ӧдя Морозова
Мунӧ рытын Куликовӧ.
Тувччас вӧлі воськов дас — 
Пыр и вӧчас пернапас...
Симӧ Мишка вӧлі тешкодь...
Полӧм делӧ сылы веськодь...
Дерт ӧд, сійӧ вӧлі зон...
Тупыльтчас да — лоӧ пон...
Ӧдя кыдзи вермӧ пышйӧ — 
Пон водзвылын гортлань пызйӧ...
Рыныш бердӧ зургис плеш...
Пернапасыс вӧчис теш!
Ӧтчыд бара Илля Ӧдя
Гуяс дорӧд мунӧ беддя...
Мишка нявзӧ, быттьӧ кань
(Сідзи дурліс важысянь)...
Ӧдя повзис — «дай бог ноги!»...
Ӧдйӧ-й пызйис, лети-воки...
Ёна повзис Ӧдя тьӧт — 
Мӧдысь ӧткӧн оз нин пет.
Ӧтчыд рытын «Сӧргорт» туйӧд
Ларӧ Прокӧ кыскӧ куйӧд.
Мишка сэтшӧминад сюсь...
Прӧста овны рытыд кузь...
Мыйӧн Мишка паныд петіс — 
Прокор вӧвлы плетьӧн сетіс,
Сэтчӧ пӧри куйӧд додь...
Ачыс, дерт нин, повзискодь...
Сідзи Симӧ Мишка олӧ,
Войнад уналаӧ волӧ...
Дзикӧдз нин пӧ воши лад — 
Полысь йӧзлы ыджыд мат.
Со ӧд коммунистлы дзугыд:
Весиг пӧдса мӧдаръюгыд...
Збыль сідз абу — ме ог тӧд...
Гашкӧ-й, бабаяслӧн вӧт.