РӦШТВО ДЫРЙИ КАРЫН
(Казьтылӧм)

Рӧштво «куття» лунӧ гажа — 
Локтӧ ыджыд праздник...
Миян попным, кыдзи-й важӧн,
Вурис выль пӧдрасник...

Туйяс вылын йӧзыд ызгӧ,
Жӧдзӧ том и пӧрысь;
Мукӧд «ёлка» даддьӧн кыскӧ
Челядьыслы вӧрысь.

Быдӧн нюмъялӧны вомнас,
Быдӧнлы сэк долыд...
Татшӧм праздник ӧти вонас
Кыкысь ӧд оз волы.

Сійӧн со и томджык войтыр
Виччысисны рытсӧ
(Колӧ пӧрысь йӧзысь войдӧр
Сёйны яя шыдсӧ)...

Рытын, воддза лунся мозыс,
Лектричество ломзис — 
Том войтырлӧн сус кристосыс
Пыр и чужис — ловзис...

Сэк Гимназия-Нардомӧ
Быдӧн локтіс, пырис;
Паськыд жыръяс, помысь помӧ,
Том войтырӧн тырис.

Сэні, гажа спектак бӧрын,
Вӧлі сьылӧм, йӧктӧм;
Быдӧн йӧктіс зала шӧрын,
Эз ков мырдӧн тшӧктӧм.

Гажа, гажа вӧлі ворсӧм,
Кыссис вой шӧр бӧрӧдз...
Со нин петук кылӧ горзӧ:
«Садьмӧй, коді пӧрысь!»

Со нин воссис вичко ӧдзӧс,
Жыннян бовгӧ гора — 
Век на важ моз пемыд йӧзӧс
Затренняӧ корӧ.

Вичкоӧ сэк пӧрысь войтыр
Туйяс вылӧд «люзьгӧ» — 
Ворсанінысь том йӧз котыр
Налы паныд гузьгӧ...

Важӧн вичко вӧлі тырлӧ,
Локтӧ йӧзыд уна;
Поплӧн доход оз и бырлы — 
Содӧ лунысь лунӧ.

Ӧні вичко ветлӧм могтӧ
Кресталісны шомӧн,
Сӧмын пӧрысь йӧйыс локтӧ,
Зэв нин кызь вит — комын.

Сы понда и миян попыд
Йӧзлы кутіс кайтны:
«Ми воклы пӧ лои топыд,
Тадзи пӧ эг чайтлы»...

Коді вичко гажӧн олӧ,
Коді сэтчӧ шлёнгис,
Сылы гажыс эз и лолы,
Сӧмын юрнас клёнгис...

Кысь нин коньӧръяслы йӧктӧм — 
Вичко шӧрын ворсӧм...
Сӧмын вӧлі пельлы сьӧктӧд — 
Ӧти пӧлӧс горзӧм...

Сійӧ ладнӧ. Кывзӧй водзӧ!
Вичкоын кор сьывсис,
Славитны сэк вӧлі позьӧ
Рӧштво праздник йывсьыс.

Котралӧны посни войтыр,
Оз нин повны енсьыд — 
Пырӧм бӧрын, сьывтӧдз войдӧр,
Юалӧны тэнсьыд:

«Со пӧ, меным, Ладимерлы,
Висьтав по совести:
По-поповски колӧ сӧрны,
Али по-советски?»...

Ёна жӧ нин, челядь пиян,
Сэтшӧм кывйыд любӧ...
Вичко пыдди колӧ тіян
Гажӧдчыны клубын...

«Рождество» сьывлісны войдӧр,
Ӧні вежсис олӧм;
«...чеччы, ёрӧм дорӧм войтыр!»
Славитнытӧ колӧ.

Сійӧ бара шуам ладнӧ...
Рӧштво асыв коли;
Видзӧдан да, лун шӧр кадӧ
Люзьялӧны нёльӧн.

Дерт ӧд, найӧ дякъяс-попъяс,
Морттӧ пыр и тӧдан — 
Босьтӧмаӧсь гырысь нопъяс
Мышканыс гоз-мӧдӧн.

Керкаясын «тырлы-бырлы»
Сьылӧны век моръяс;
Медся радейтӧны пырны
Кӧні пӧрысь-дзоръяс...

Онӧ либӧ найӧс ылӧд,
Тӧдасны тай лёка:
Мукӧд керка дінысь ылӧ
Чукыльтасны бокӧ...

«Татчӧ пырны пӧ ми полам — 
Коммунистлӧн керка...
Эстӧн бара сэтшӧм олӧ
Комсомолка Верка»...

Сідзи найӧ полӧмсорӧн
Котралісны рытӧдз;
Ӧктысисны зэв нин сёрӧн — 
Рытъя кыа быртӧдз.

Рытнас Кырувса ныв-зонлӧн
Клубын мӧдіс гажыс,
Сӧмын кодъясӧскӧ, зонмӧ,
Век на кыскӧ важыс.

Ывла вылын кутіс лёкысь
Кывны вучка-вачка:
Кодкӧ мӧдлы кылӧ бокас
Лӧсьыда и швачкӧ...

Клубын повзьӧмаӧсь челядь,
Мукӧд бӧрддзис «ойӧн»...
Сэки пырасны кӧть щеляд.
Кӧні мый пӧ-й лои...

Вӧлӧм ывла вылас, сэні,
Кӧкулькарса зонъяс
Кырувсакӧд пуркӧдчӧны,
Быттьӧ пурсьысь понъяс...

Ӧнъя дырйи сэтшӧм дурӧм
Абу жӧ нин лӧсьыд;
Колӧ гажӧдчыны бурӧн,
Мед оз дивит пӧчыд.

Колӧ гажӧдчыны ёна,
Оз ков пырны косьӧ — 
Бура олӧм медся дона,
Сідзи овны позьӧ!