САЛДАТ СЬЫЛАНКЫВ

Кыдзи миян Сыктывкарын
Петкӧдчыліс Латкин-барин,
	Бур...
Мукӧд, радла, уна пуис
Самӧкур да ыджыд туис
	Сур...
Прокушев на дорӧ кежис,
Сэсся Латкин пыр и вежис
	Власьт...
Гӧльӧс кутіс лёкысь пыкны...
Сідзжӧ воис большевиклы
	Страсьт...
Гӧгӧр звӧнитӧны, кылӧ,
Пӧрысь йӧзкӧд гора сьылӧ
	Поп...
Кодкӧ лавка ӧшинь вартіс — 
Сатинысь да нойысь гартіс
	Ноп...
Регыд барин вина бучкис — 
Эз и тӧдлы, быттьӧ кучкис
	Ньӧр...
Прӧстӧ сылӧн волӧм лои:
Краснӧй права карӧ воис
	Бӧр...
Огӧ сэтшӧм йӧзысь полӧ...
Сӧмын миян вылӧ волӧй
	Ті!...
Кодыр ковмас — мунам ылӧ,
Буржуй дорӧ война вылӧ,
	Ми.
Мый ті, нывъяс, сэтшӧм чӧлӧсь?
Сьыланкывйыд уна пӧлӧс
	Эм...
Морӧс шӧрын сьӧлӧм йӧктӧ...
Мича нывъяс, кытшӧн йӧктӧй
	Мем!
Том салдатӧс босьтӧй шӧрас,
Кокыс сылӧн зіля вӧрас — 
	Том...
Окасьны салдаткӧд колӧ;
Тіян оз быр — век на кольӧ
	Вом...