«ВЕЧЕР»

Рыт кӧ воас, вечер вылӧ
Мунӧны том йӧз.
Сійӧ пӧраын туй вылын
Кыссьӧ, быттьӧ гез...
Со и вечер, гажа вечер:
Керка йӧзӧн тыр;
Нывъяс, зонъяс ыджыд чукӧр,
Кыдзи вӧрын мыр...
Налӧн бурмӧ сэні сьӧлӧм,
Оз ков вина-сур.
Со и йӧктӧм, сэсся сьылӧм
Садь войтырлӧн бур.
Сэні «жӧник» ветлӧ-сьылӧ:
«Я сыскал, нашёл»...
Ӧти мортлы шуӧ, кылӧ:
«Шурин, ты пошёл!»
Сэні кытшӧн ворсӧм бара — 
Ныв-зон сувтас тшем;
«Трипан дядьӧс» горзӧм гора...
«Римскӧй папа» сэн...
Ворсасны и мукӧд ногӧн,
Мудзтӧдз — быдӧн збой.
Некод оз мун сэтысь лӧгӧн,
Гажа кольӧ вой.