ТОМӦН ГӦТРАСЬЫСЬЛӦН СЬЫЛАНКЫВ

Овныд кужны колӧ вӧлӧм:
Колӧ ӧткӧн овны дыр;
Ӧні бӧрдӧ менам сьӧлӧм — 
Курыд шогӧн сійӧ тыр.

Кор ме зонъяс кадӧ вои,
Кодыр вежӧр эз на вӧв,
Сэки ачымӧс ме сёйи:
Босьті гӧтыр, аслым пӧв.

Сідзи гӧтраси ме томӧн,
Ёна томӧн чеги борд...
Ӧні овны лоӧ «домӧн» — 
Лои шӧрӧ вошӧм морт.

Зонмӧн олӧм эг и тӧдлы,
Йӧз моз овны эг ме куж;
Сӧмын челядь олӧм тӧдлі,
Сямтӧг вӧчи омӧль удж...

Том бур кадӧй коли бӧрӧ — 
Югыд шонді, мусатор!
Коли жальӧн сійӧ пӧра,
Ӧні кватитчи — да сёр!..

Думӧн лэбны кӧсъя вӧлі,
Кӧсъя вунӧдны ме шог...
Вӧлӧм кольӧма нин ылӧ — 
Том бур кадыд бӧр оз лок...