КОНЬӦР

Зэв шога оліс гӧль крестьянин,
Эз волы сылы долыдлун;
Эз повлы некор сьӧкыд уджысь,
Пыр тільсис-мырсис вой и лун.

Эз жалит некор ассьыс вынсӧ,
Кӧть кӧдзыд, пемыд — ставыс шань.
Йӧз кодя овны, дерт, эз вермы:
Эз тырмыв сылӧн асшӧр нянь.

Удж вылын отсӧг — вӧлі гӧтыр,
Эз тӧдлы сідзжӧ шойччӧм мог...
Дыр висьӧм бӧрын гӧтыр кулі — 
Шог вылӧ локтӧ век нин шог.

Сы бӧрын сотчис и важ керка,
Мый вӧлі — сійӧс сотіс би.
Гӧль олӧм быри, воис помыс...
Став пыдди коли ичӧт пи.

А пиыс том на, зэв на ичӧт — 
Сы помысь зэв на ылын бур...
Ас морӧс бердас босьтіс писӧ,
Да шога, коньӧр, ӧшис юр.