ВОАС ПОМ!

Война помасьӧм бӧрын гырысь гыӧн муніс рабочӧйяслӧн да крестьяналӧн кыпӧдчылӧмъяс капиталист правительствояс вылӧ. Дзикӧдз кутліс путкыльтчывны олӧмныс капиталистъяслӧн: Германияын, Венгрияын рабочӧйяс босьтлісны власьтсӧ ас кипод улас, мукӧдлаын муніс забастовкаяс, оружйӧӧн рабочӧйяс косясисны асьнысӧ дзескӧдысьяскӧд. Но тайӧ кадлы воис регыд пом, капиталистъяс венісны рабочӧйясӧс да крестьянаӧс, сӧмын Россияын рабочӧйяс да крестьяна вермисны вӧчны асногса олӧм.

Мый вӧсна эз вежсьы капиталист государствоясын олӧмыс? Мый вӧсна капиталистъяс важ моз ӧшйисны рабочӧйяс да крестьяна вылӧ?

Войдӧр капиталист государствояс зычитісны ас костаныс; мыйӧн рабочӧйяс да крестьяна кутісны путкыльтны капиталистъяслысь олӧмсӧ, пырысьтӧм-пыр капиталистъяслӧн аскостса зык вуні. Найӧ — медгырысь рушкуасяньыс медбӧръя рабочӧйясӧс да крестьянаясӧс ылӧдлысьяс партияясӧдз — ӧтувтчисны мӧда-мӧдсӧ дорйыны рабочӧйяс да крестьяна водзын.

Капиталистъяслӧн ӧтувтчӧмыс оз тӧд некутшӧм межа. Найӧ регыд вунӧдӧны аскостса зыксӧ, кутасны кӧ кутшӧмкӧ государствоын рабочӧйяс да крестьяна венны ассьыныс капиталистъяссӧ. Ёна миянлы аслыным дӧнзис бокӧвӧй капиталистъяс понда, Венгрияысь революциясӧ талялісны румынскӧй бояринъяс (Франция, Англия тшӧктӧм серти), мукӧд государствоса капиталистъяс отсалӧмӧн жӧ вирӧн пӧдтісны и революция Германияысь.

Медъёна рабочӧйяс да крестьяна водзын мыжаӧсь капиталистъяс Америкаысь (С. Ш. С. А.)

Война дырйи Америка кыптіс, став му вывсьыс джын зарниыс воис америкаса капиталистъяс кассаӧ дай став европейскӧй государствоясыс колины сылы уджӧн (долгӧн).

Та бӧрти Америка кутіс пӧдны зарни да тӧвар пытшкын, сылы ковмис вузаланін (рынок), гӧль Европа, европаса рабочӧйяс, медым сылӧн ёнджыка содас сьӧм дозйыс бокӧвӧй рабочӧй пӧсьӧн.

Ковмис сылы и колониальнӧй странаяс (Африка, Китай да мукӧд), медым мукӧд капиталист государствояс пыдди вермас нёнявны пӧсьсӧ да вирсӧ тшӧтш колониальнӧй йӧзлысь.

Гӧль Европаӧс венны Америкалы абу сьӧкыд, регыд Америка кутіс кӧзяинавны капиталист государствояс вылын — ӧд пыдди пуктытӧг Америкаыд оз сет сьӧмтӧ, а сьӧмтӧгыд, буракӧ, он кыпӧд олӧмтӧ.

Ӧні овмӧсыс капиталист государствоясын Европаын кутіс кыптыны: пабрик-заводъяс кутісны уджавны, важ моз кутісны пычкыны рабочӧйяс вирсьыс да пӧсьсьыс зарни. Дерт, оз позь шуны, мый быдлаын капиталистъяслӧн ёнмӧ овмӧсыс, но орччӧдны ӧнія кӧзяйствоӧс дзик война бӧръя кӧзяйствоӧн оз позь.

Сямыс капиталистъяслӧн — мӧда-мӧдныскӧд вензьӧм. Быри эз капиталистъяс кост ӧні вензьӧмыс? Эз. Медгырысь вензьысьясыс ӧні Америка да Англия; Европа пытшкын вензьӧмыс капиталистъяслӧн содӧ жӧ.

Ӧні мунӧ сёрни капитал. государствояс кост оружйӧяс чинтӧм йылысь (разоружитчӧм йылысь). Капиталист государствояс оз кӧсйыны петны кось вылӧ. Пыдӧдзджык кӧ видзӧдлам та вылӧ, аддзам, мый тайӧ сёрниыс сӧмын лицемеритӧм. Капиталистъяс косьтӧг оз вермыны овны — оружйӧ чинтӧм йылысь сёрни лоӧ выльысь кось вылӧ лӧсьӧдчӧм.

Коді пуктас пом косьлы да капиталистъяслы?

Колониальнӧй йӧз да рабочӧй класс. Колонияясын (Китайын, Индияын, Сирияын, Мароккоын) йӧзыс кыпӧдчӧны. Рабочӧйяс став государствояссьыс ӧтувтчӧны. Кымын кыптӧны колониальнӧй йӧз, кымын ӧтувтчӧмӧн кыптӧны рабочӧйяс капиталист государствоясын, сымын капиталистъяслӧн троныс ёнджыка вӧрӧ, сымын капиталистъяслы воас регыдджык пом.

Мый шуис Коммунист партиялӧн 14-ӧд съездыс капиталистъяслы пом воӧм йылысь?

Колӧ пӧ став му вывсьыс рабочӧйяссӧ чорыда йитны миян рабочӧйяскӧд. Колӧ пӧ асыввывса колонияясысь нартитӧм йӧзӧс ӧтувтны рабочӧйяскӧд да СССР-кӧд. Кымын регыд ӧтувтчам да чорыда йитчам, сымын регыдджык воас капиталистъяслы мукӧд странаясын пом, сымын регыдджык воас ставмувывса революция.