МӦДА-МӦДӦС ОТСАЛӦЙ КОМИТЕТ ПЫР

Сыктывкарын воссис мӧда-мӧдлы отсасян комитетъяслӧн обласьтувса съезд.

Регыд на мӧда-мӧдлы отсасян комитетъяс сулалӧны миян обласьтын, сӧмын став гӧль крестьяна гӧгӧрвоисны нин сылысь бурсӧ, уналы нин сійӧ сетіс отсӧг бурмӧдны олӧмсӧ.

Сӧвет власьт крестьяна водзӧ пуктіс ыджыд удж — бурмӧдны сиктъясысь олӧмсӧ, гӧль крестьяналысь овмӧссӧ кыпӧдӧмӧн дорйыны озыр-кулакъясысь. Татчӧдз воны гӧль крестьяна вермасны сӧмын ӧтувтчӧмӧн кооперативъясӧ, тӧвариществоясӧ да мӧда-мӧдлы отсасян комитетъясӧ. Медыджыд отсӧг поснисянь гырысьӧдз вермас сетны гӧль крестьяналы мӧда-мӧдлы отсасян комитетъяс. Ньӧбны-ӧ скӧт, вӧчны керка либӧ отсавны крестьянинлы пикӧ воӧм дырйи — быдлаын крестьяналы паныд мунӧны мӧда-мӧдлы отсасян комитетъяс.

Уна пӧлӧс отсӧг гӧль крестьяналы сетӧны мӧда-мӧдлы отсасян комитетъяс, колӧ сӧмын бура пуктыны сэні уджсӧ.

Миян обласьтын тшӧкыда овлывлӧ мӧда-мӧдлы отсасян комитетъяслӧн дзик прӧста вылӧ сьӧм лотайтӧм. Босьтам кӧть сэтшӧмтор: отсӧг сьӧмӧн сетӧ комитет заявленньӧ серти, оз тӧдмав, збыль колӧ оз крестьяниныслы корӧмторйыс, а сэсся сетасны сьӧмсӧ комитетсяньыс, да сьӧмсӧ крестьяниныс видзӧ кытчӧсюрӧ, посниторъяс вылӧ. Колӧ татшӧмыдлы пуктыны пом; колӧ мӧда-мӧдлы отсасян комитетъяслы тӧдны, кытчӧ видзсьӧ сылӧн отсӧгыс, оз-ӧ мун сійӧ кытчӧкӧ мукӧдлаӧ. Сэсся мукӧддырйиыс комитетъясыс сьӧмсӧ (отсӧгсӧ) сеталӧны поснитор вылӧ, а гырысьджык отсӧг вылас сьӧмыс оз коль. Бур кӧзяин тадзи оз вӧч: первой сійӧ лӧсьӧдас гырысь колантор, сэсся поснисӧ, водзӧ кежлӧ колӧ посни отсӧгысь дугдыны.

Татшӧм омӧльторъяссӧ мӧда-мӧдлы отсасян комитетъяс вермасны бырӧдны, шленъясыс кӧ ставныс ӧткодя уджалӧны комитетас, ставныс кӧ тӧдӧны кытчӧ, мый вылӧ мунӧ комитетлӧн отсӧг.

Обласьтувса съезд веськӧдас уджсӧ мӧда-мӧдлы отсасян комитетъяслысь. Сійӧ висьталас, кыдз колӧ мӧда-мӧдлы отсавны комитет пыр.

Гӧль крестьяна, пырӧ мӧда-мӧдлы отсасян комитетъясӧ, сійӧ мездӧ кулак кипод улӧ сюрӧмысь!