МЫЙ ШУИС СИЗИМӦД ОБЛАСЬТУВСА КОММУНИСТ ПАРТИЯЛӦН ЧУКӦРТЧӦМ (КОНФЕРЕНЦИЯ) КОМИ НЫВБАБА ЙЫЛЫСЬ

Коми нывбаба воысь воӧ петӧ нэмӧвӧйя пемыд олӧмысь, мунӧ югыдлань. Содӧны делегатскӧй чукӧръяс да делегаткаяс, унджык нывбабаӧс бӧрйӧны Сӧветъясӧ народнӧй заседательясӧ, мӧда-мӧдлы отсасян комитетъясӧ да мукӧдлаӧ.

Тайӧ воас вӧлӧсьтувса сӧветъясын 197 нывбаба (мӧйму вӧлі 74), народнӧй заседательясын — 550 (мӧйму вӧлі 200 нывбаба).

Крестьянкалӧн вежӧрыс содӧ, содӧ сылӧн и йӧз кост уджалӧм. Мед эськӧ и водзӧ содас коми крестьянкалӧн уджалӧмыс общественнӧй удж вылын, партиялӧн конференция шуис: став общественнӧй организацияяслы колӧ бурджыка видзӧдны делегаткаяс удж вылӧ; индавны, туйдӧдны, велӧдны уджавны йӧз костын делегаткаясӧс, кодъясӧс ыстӧмаӧсь делегатскӧй собранньӧяс велӧдчыны учрежденньӧясӧ (практиканство). Мед Сӧветъясӧ бӧрйӧм нывбабаяс-крестьянкаяс велаласны уджавны, колӧ кыскыны найӧс делегатскӧй собранньӧяс вылӧ, нуӧдны накӧд торъя сёрнияс (совещания) — велӧдны, кыдзи нуӧдны вӧлӧсьтын общественнӧй удж. Мед нывбабаяс ёнджыка матыстчасны партия бердӧ, колӧ унджык тӧлка нывбабаясӧс пыртны партияӧ — крестьянкаясыс партияас ёна на этша.

Миян Совет власьтлӧн кӧзяйство ёнмӧ: кыптӧ промышленносьт, пыр кайӧ сельскӧй кӧзяйство. Коми обласьтлӧн сідзи жӧ кӧзяйство кыптӧ. Конференция шуис: колӧ пӧ ёнмӧдны кӧзяйство деревняса гӧль йӧзлысь, зільны ӧтувтны найӧс шӧркоддьӧма олысь крестьянакӧд. Коми крестьянка пӧ оз на тӧд туйяссӧ, кыдзи кыпӧдны, кокньӧдны ассьыс олӧмсӧ; удждысян тӧвариществояслы, мӧда-мӧдлы отсасян комитетъяслы пӧ оз ков эновтны найӧс нуждаяс дырйи, му-видз лӧсьӧдалігъясӧн; колӧ пӧ ӧтувтны нывбабаясӧс артельясӧ, отсавны ӧтув судзӧдны налы нывбаба удж кокньӧдан машинаяс (шабді-пыш няръялан, идзас вундалан да мукӧд пӧлӧс). Челядя мамъяслысь-крестьянкаяслысь да найӧ челядьяслысь олӧм кокньӧдӧм вӧсна конференция шуис отсавны лӧсьӧдны гожӧм кежлӧ челядь яслияс быд вӧлӧсьтын.

Мед крестьянка бура тӧдіс ассьыс праваяссӧ да кужис бурмӧдны ассьыс олӧмсӧ, конференция шуис, колӧ пӧ найӧс ёнджыка велӧдны грамотаӧ. Быд нывбабалы колӧ тӧдны, кыдзи уджалӧны обласьтын мукӧд крестьянкаяс, кыдзи найӧ мырсьӧны лэптыны ассьыныс олӧмсӧ, кокньӧдны ассьыныс уджсӧ. Колӧ тӧдны тшӧтш, кутшӧма олӧны-вылӧны крестьянкаяс да мукӧд уджалысь нывбабаяс Рочму пасьта.

Мед эськӧ крестьянка вермас гижны аслас олӧм йылысь, удж йылысь, конференция шуис: «Югыд туй» газетын торйӧдны пельӧс да сэні печатайтны крестьянка олӧм-уджалӧм йылысь.

Ещӧ конференция шуис: быд коммунистлы пӧ колӧ бура видзӧдны нывбаба удж вылӧ, мед пӧ быдӧн отсалісны нуӧдны на пӧвстын.

Коммунист партия ёна тӧждысьӧ нывбабалысь олӧм кокньӧдӧм вӧсна.

Коми аньяс! Ас саяныд выль бур олӧм лӧсьӧдӧм. Кутчысьӧй чорыдджыка уджӧ тайӧ конференция шуӧм сертиыс.

Н. Анисимова.