МЫЙ ШУИС ОБЛАСЬТУВСА СӦВЕТЪЯСЛӦН СЪЕЗД

Обласьтувса Сӧветъяслӧн съезд помасис. Съезд лӧсьӧдіс план, индіс туй обласьтувса исполкомлы водзӧ кежлӧ уджавны, тшӧктіс ещӧ ёнджыка босьтчыны обласьтувса овмӧс кыпӧдны: восьтыны замша вӧчан пабрика, фосфорит перъян завод, лӧсьӧдны туйяс (бутканскӧй тракт да Верхолузьйӧ туй).

Съезд шуис не пырны комияслы Асыв-Войвыв обласьтӧ. Комилӧн кӧзяйство мунӧ мӧд туйӧд, некутшӧм йитӧд Кардоркӧд миян абу, комилӧн аслас культура; сы вӧсна обласьтувса исполкомлы колӧ корны центральнӧй исполнительнӧй комитетлысь, мед торйӧдісны Коми обласьтсӧ торъя экономическӧй районӧ, да корны, мед вӧлі миян Коми автономияысь республика. Сідзжӧ тшӧктіс съездыс обисполкомлы нуны удж — ӧтлаавны комияссӧ Вятскӧй губерняысь миянкӧд да Печӧра кывтыдса вӧлӧсьтъяссӧ тшӧтш Коми обласьтӧ сюйны.

Местнӧй бюджетӧ медыджыд доход воӧ кер лэдзӧмысь; сы вӧсна съезд шуис: колӧ пӧ кер лэдзӧмсӧ бурджыка лӧсьӧдны. Колӧ посни юяс вылӧ кайны, петкӧдны кер ылыс делянкаясысь. Локтан воын вӧр лӧсьӧдӧм удж вылӧ съезд шуис корны государстволысь, мед сійӧ лэдзис унджык сьӧм. Кер лэдзӧм заводитны кыдз позьӧ водзджык аръясын: сентябр 15 лун кежлӧ пӧ ковмас делянкаяссӧ индыны нин. Сэсся съезд шуис крестьяналы унджык сетавны дон босьттӧг кер, содтыны нормасӧ.

Сельскӧй кӧзяйство йылысь съезд со мый шуис: колӧ кыпӧдны, колӧ лӧсьӧдны унджык вӧлӧсьтын агрономъясӧс, сетны налы сьӧм, мед вермас агроном тшӧкыдджыка вӧлӧсьтъясӧ ветлыны. Колӧ кӧйдыс весалӧм паськӧдны. Колӧ видз-му уджалан машинаяс унджык разӧдны. Выль бюджетнӧй воын сетны 10 прӧчент сельскӧй кӧзяйство вылӧ. Кӧдзаяс колӧ страхуйтны шер жугӧдӧмысь кындзи кынмалӧмысь тшӧтш. Сельскокӧзяйственнӧй налог колӧ босьтны доход серти.

Вузасьӧм йылысь съезд шуис бырӧдны тӧргӧвӧй организацияяс костын конкуренция. Посни вӧлӧсьтъясын Госторглысь вузасьӧмсӧ ковмас дугӧдны. Кольны сӧмын кӧн частнӧй тӧргӧвӧйяс эмӧсь. Коми обласьтысь заграничаӧ мунӧ зэв уна пушнина; корны колӧ, мед Коми обласьтын вӧлі восьтӧма мукӧд государствояс кост да пытшкӧса вузасьӧм лӧсьӧдан Комиссариатлӧн юкӧд. (Отделение Наркомвнуторга).

Колӧ кооперативъясын да мукӧд тӧргӧвӧй организацияясын бырӧдны лотайтӧм, колӧ эмбур лотайтысьяссӧ чорыда мыждыны.

Сэсся съезд шуис, ковмас пӧ удждысьӧм удж лӧсьӧдны, ковмас пӧ бырӧдны кыдзсюрӧ уджӧн сеталӧмсӧ.

Сідзжӧ съезд шуис водзӧ кежлӧ содтыны сьӧм школаяс, больничаяс кутӧм вылӧ.

Зэв унатор шуис вӧчны Обласьтувса съезд. Обисполкомлы да миянлы тшӧтш ёна ковмас зільны съездлысь шуӧмъяссӧ олӧмӧ пӧртны.