ВЕЖОН ЧӦЖӦН ВӦЛӦМТОРЪЯС
Сӧвет власьт оз кӧсйы косясьны.
Рабочӧйлӧн да крестьяна власьтлы оз ков война. Ми кӧсъям лэптыны ассьыным овмӧснымӧс, мед бурджык лоӧ олӧм. Став мувывса уджалысьяс, дерт, медъёна полӧны войнаысь жӧ, налы войнаыд оз жӧ ков.
Капиталистъяс тайӧс гӧгӧрвоӧны. Сы вӧсна найӧ пыр жӧ сёрнитӧны мир йылысь, а гусьӧникӧн асьныс лӧсьӧдчӧны косясьны. Ӧні капиталистъяслӧн правительствоясыс кутісны сёрнитны военнӧй оружйӧяс, армия, военнӧй суднояс да мукӧд сэтшӧм военнӧй кӧлуй чинталӧм йылысь, мӧд ногӧн кӧ шуны, разоружитчӧм йылысь. Дерт, тайӧ зэв бур, удж нуӧдны кӧ кутасны став капиталист правительствоыс, сӧмын оз сы йылысь думайтны капиталистъяс.
Америкалӧн да Англиялӧн эм вывті ён морскӧй флот (уна гырысь военнӧй суднояс), а войскаыс омӧльджыкӧсь. Найӧ шуӧны: колӧ пӧ чинтыны сӧмын армияяссӧ, флотсӧ пӧ чинтыны огӧ кутӧй. Налы воча сувтӧ Франция. Франциялӧн морскӧй флотыс абу ён, но сы пыдди сылӧн эм зэв ён ыджыд армия.
Таысь позьӧ гӧгӧрвоны, мый капиталистъяс сӧмын кӧсйӧны ылӧдны мӧда-мӧднысӧ да уджалысь йӧзсӧ. Веськыда кӧ шуны, капиталистъяс сӧмын кӧсйӧны мӧда-мӧдсӧ омӧльтчӧдны. Лига Наций ӧні шуис чукӧртны конференция да сэні сёрнитны разоружитчӧм йылысь. Тайӧ конференция вылас корисны тшӧтш сёрнитны Сӧвет правительстволысь представительсӧ. Дерт, ми омӧля эскам (веритам), мый капиталист государствояс кӧсйӧны збыль чинтыны ассьыныс войскасӧ, флотсӧ да мукӧдтор, но конференция вылӧ мунӧмысь огӧ ӧткажитчӧй. Гашкӧ, кыдзкӧ неуна и удайтчас чинтыны рӧскодъяс армия вылӧ да флот вылӧ. Сы вӧсна Сӧвет правительство юӧртіс конференция вылӧ локтӧм йылысь.
Ӧні миян сёрниыс мӧдтор йылысь. Лига Наций чукӧртӧ конференциясӧ Швейцарияын. Сэні Лозанна карын ӧти конференция вылын вилісны нин миянлысь представительӧс Воровскӧй ёртӧс. Швейцарияса суд виысьяссӧ ньӧти эз мыжды. Ми огӧ вермӧй ыстыны ассьыным ёртъясӧс сэтчӧ виалӧм вылӧ. Сы вӧсна Сӧвет правительство Швейцарияӧ оз кӧсйы ыстыны ассьыс представительяссӧ. Ми мунам тайӧ конференция вылӧ, лоӧ кӧ конференцияыс кутшӧмкӧ мукӧд государствоын.
Сӧвет правительство важ мозыс на сулалӧ войналы паныд. Быдпӧлӧс споръяс, зыкъяс ми зілям лӧсьӧдны бурӧн, войнатӧг. Войнатӧг олӧм йылысь неважӧн ми вӧчим договор Турциякӧд. Сэтшӧм договорсӧ ми сӧгласитчам вӧчны быд государствокӧд. Тайӧс тӧдӧны став мувывса уджалысьяс. Сы вӧсна капиталистъяс некор оз вермыны ыстыны уджалысь йӧзӧс воюйтны Сӧвет республикакӧд.
