МЫЙ КОРӦНЫ, МЫЙ ШУӦНЫ КРЕСТЬЯНА ОБЛАСЬТУВСА СЪЕЗД ВЫЛЫН

Обласьтувса Советъяслӧн витӧд съезд вылын унджык делегатыс крестьяна пиысь. Мишарин ёрт доклад бӧрын Обисполкомса уджалӧм йылысь съезд вылын висьтавлісны асланыс нуждаяс йылысь крестьяна-делегатъяс. Найӧ индалісны, кутшӧм омӧльторъяс на эмӧсь миян, мый колӧ водзӧ кежлӧ вӧчны.

Шактарев (Кулӧмдін уездысь) корӧ регыдджык заводитны тӧчила перйыны Печӧраын. Колӧ пӧ организуйтны крестьяна пиысь артельяс, мед эськӧ кокньыдджык вӧлі уджавны крестьяналы да унджык воис нажӧтка. Сэсся корӧ, мед Обисполком видзӧдлас страхуйтӧм дон вылӧ. Ӧні, шуӧ Шактарев ёрт, страховка да налог дзик ӧткодь. Колӧ страховкасӧ чинтыны.

Леканов (Сыктыв уездысь) шуӧ: сетӧй миянлы бур агрономъясӧс, мед быд вӧлӧсьтын вӧлі ёна велӧдчӧм, тӧдысь агроном. Сэк крестьяна регыд овмӧссӧ кыпӧдасны. Сэсся колӧ Сӧветскӧй станцияясын уджсӧ бура сувтӧдны, колӧ донсӧ быдлаын ӧткодьӧс лӧсьӧдны (ӧні миян кӧнсюрӧ 7 урӧн мынтӧны верстысь, мукӧдлаын 5 урӧн). Вит ур, дерт, ичӧт дон, колӧ содтыны 6 урӧдз.

Сухарева (Гамысь нывбаба) висьталӧ: миян Гамын эм зэв уна рудаяс да быдсяма сикас краска. Колӧ заводитны перйыны найӧс.

Мед эськӧ миян челядь быдмисны ёнӧн, колӧ восьтыны быд вӧлӧсьтын челядь видзанінъяс (ясли) гожӧм кежлӧ.

Юхнин (Сыктыв уездысь): кер лэдзысьяслы ёна на сьӧкыд уджавны, нажӧтка важ серти ичӧт, колӧ водзӧ кежлӧ донсӧ неуна содтыштны.

Киселев (Кулӧмдін уездысь): Эжва вожысь крестьяна важӧн да и ӧні тшӧтш ёна ветлӧны уджавны Уралса заводъясӧ. Заводса комбинатъяс договоръяссӧ да условйӧяссӧ оз на кутны, дзескӧдыштӧны на мукӧддырйи рабочӧйясӧс. Обисполкомлы колӧ шуны, мед комбинатъяс условйӧяс серти уджалісны.

Попов (Емдін уездысь) шуӧ: колӧ видз-му уджалан юкӧдлы тулыссянь юӧртны крестьянаӧс, кӧн тӧвнас кер лэдзны кутасны; сэн крестьяна вермасны заптыны кер лэдзанінъясас турун да мукӧд колантор водзвыв.

Ивашев (Висер вожысь): кӧдзаяс колӧ страхуйтны не шер жугӧдӧмысь, а кынмӧмысь да косьмӧмысь.

Со мый шуӧны крестьяна съезд вылын, со мый найӧ корӧны.