«БЫРӦДАМ ПЕМЫДЛУН» НИМА ОБЩЕСТВО ЙЫЛЫСЬ

Быд вӧлӧсьтын эськӧ миян эмӧсь «Бырӧдам пемыдлун» («Долой неграмотность») обществолӧн ячейкаяс, сӧмын сійӧ лыддьыссьӧны куш бумага вылын, некутшӧм удж оз нуӧдны, а уджыс сылӧн юр выв тырыс. Кывсьӧ, мый школаясӧ гырысь велӧдчысьяс омӧля ветлӧны. Сійӧ бара жӧ сы вӧсна, мый ячейкаяс омӧля уджалӧны вӧлӧсьтъясын. Уджыс кӧ эськӧ сылӧн муніс бура, школаяс эськӧ велӧдчысьясӧн вӧлі тыр. Оз ков вунӧдны: октябр революциялы дасӧд во тыригкежлӧ миянлы колӧ кызвын неграмотнӧйсӧ велӧдны, а велӧдӧм удж бура сувтӧдны вермасны сӧмын асьныс уджалысь йӧз. Колӧ тайӧ удж дінас чорыдджыка кутчысьны, быдӧнлы пырны «Бырӧдам пемыдлун» нима обществоӧ.

Мый нӧ колӧ керны вӧлӧсьтъясын «Бырӧдам пемыдлун» нима обществолы?

1. Велӧдны неграмотнӧй шленъяссӧ аслас ячейкаясысь.

2. Тӧдмавны-лыддьыны велӧдчытӧм йӧзсӧ сиктъясысь, грездъясысь.

3. Отсавны ликпунктлы, тӧждысьны, мед сійӧ вӧлі шоныд, югыд, мед тырмымӧн вӧлі гижан-лыддьысян кӧлуй, мед велӧдчысьяс эз эновтчыны школаӧ ветлӧмысь, мед велӧдчысь сэні вӧлі тырмымӧн (30−40 морт). Оз кӧ вермы велӧдчысь мыйкӧ вӧсна школаӧ ветлыны, общество ыстӧ грамотнӧй мортӧс велӧдчысьсӧ гортас велӧдны.

4. Кор ликпункт велӧдчысьясӧн тырӧ, колӧ сэсся грамотнӧй шленъяслы аслыныс кутчысьны велӧдны неграмотнӧйясӧс. Кыдзи колӧ велӧдны — индасны школаын велӧдысьяс.

5. Тӧждысьны, мед школаясас колян воясас велӧдчӧм йӧз эз вунӧдны лыддьысьны-гижны: налы колӧ ыстыны газетъяс, нигаяс (лыддьысян керкаын удж нуӧдыськӧд ӧтвылысь), колӧ чукӧртны кружокӧ быд праздник да лыддьӧдны-гижӧдны, колӧ найӧс кыскыны лыддьысян керкаясӧ докладъяс да газет лыддьӧм кывзыны, быдсяма пӧлӧс кружокъясын уджавны.

6. Быд лыддьысян керкаын да школаын колӧ лӧсьӧдны выставка. Сійӧ выставкаыс мед петкӧдлас: кымын велӧдчытӧм морт эм РСФСР-ын, Коми обласьтын, аслас вӧлӧсьтын, сиктын, кымынӧс велӧдӧма, уна-ӧ коли велӧдны, кыдзи олӧны велӧдчӧм крестьяна мукӧд государствоясын, уна-ӧ миян на серти быдмӧ нянь, кутшӧм скӧт, уна-ӧ кулысь-висьысь да мукӧдтор.

7. Вӧчавны докладъяс, спектакъяс, агитсудъяс велӧдчӧм йылысь.

8. Кыскыны комсомолӧс, профсоюзъясӧс йӧзӧс велӧдан удж нуӧдны.

9. Лӧсьӧдны гораа лыддьысьӧм сэтшӧмъяслы, кодъяс асьныс оз кужны лыддьысьны.

10. Чукӧртны сьӧм ликпунктлы да малограмотнӧйяслы отсавны: ньӧбны газетъяс, нигаяс, гижан кӧлуй да мукӧдтор.

11. Быд ног отсавны велӧдчысьяслы, велӧдысьяслы.

12. «Бырӧдам пемыдлун» нима обществоса ячейкаяс лӧсьӧдны быд лыддьысян керкаын, быд школаын, пыртны сэтчӧ унджык шлен.

13. Быд шленлы колӧ сетны кутшӧмкӧ удж.

14. Быд кык вежон мысти шленъяслы колӧ чукӧртчывны; висьтавны, коді кутшӧм удж вӧчис, кыдзи водзӧ сійӧ уджсӧ нуӧдны.

Ж—ов.