СӦВЕТ ВЛАСЬТ ТӦЖДЫСЬӦ КРЕСТЬЯНА ВӦСНА

Декрет дзоньвидзалун кутӧм йылысь

Омӧля на сувтӧдӧма миян дзоньвидзалун кутӧм удж сиктъясын. Висьмас кӧ крестьянин, лоӧ сылы 50 верст сайӧ больничаӧ мунны. Сэсся больничаяс миян этша на, висьысьясӧн ставыс тырӧмаӧсь, крестьянинлы мукӧддырйи лоӧ бӧр гортас мунны.

Овмӧс миян ӧні ёнмӧ, сӧвет власьт вермӧ нин унджык сьӧм сетны дзоньвидзалун кутӧм вылӧ.

Январ 6 лунӧ Ставрочмувывса Центральнӧй Исполнительнӧй Комитет да Совнарком лэдзисны декрет крестьяналысь дзоньвидзалун кутӧм йылысь. Тайӧ декрет серти, уджалысь йӧзӧс больничаясын кутасны лечитны сьӧм босьттӧг, сідзжӧ лекарствояс сетавны кутасны сьӧмтӧг, докторӧс кӧ ковмас висьысь дінӧ вайны, оз жӧ ковмы нинӧм мынтыны.

Сэсся быд вӧлӧсьтын, декрет серти, колӧ восьтыны больничаяс, гырысь вӧлӧсьтын лоӧны ещӧ больничалӧн юкӧдъяс. Быд сиктса больничаын лоӧ восьтӧма: амбулатория (висьысьясӧс видлаланін), кага чужанін юкӧд, вуджан висьӧмъяс юкӧд, пинь лечитан кабинет да аптека.

Больничаясын сетавны кутасны справкаяс мамъяслы кага быдтӧм йылысь. Гожӧмъясын быд больничаын лоӧ восьтӧма челядь видзанінъяс (ясли).

Вӧлӧсьтъясын, кӧн ёна висьӧны лёквисьӧмӧн (сифилисӧн), чакоткаӧн, син висьӧмӧн (трахомаӧн) да мукӧд сэтшӧм висьӧмъясӧн, лоӧ больничаясын восьтӧма торъя юкӧдъяс.

Вӧлӧсьтувса больничаясын висьысь челядьлы лоӧ восьтӧма челядь ворсанін (площадка), писти вундылӧмин да лоӧ выставка дзоньвидзалун кутӧм йылысь.

Декрет тшӧктӧ тайӧ уджсӧ лӧсьӧдны локтан вит вонас.