ӦТУВТЧӦЙ, РАБОЧӦЙ КРЕСТЬЯНАКӦД
Ленин ёрт кулӧмлы кык во тырӧм бӧрын колӧ казьтыштны сылысь медыджыд тшӧктӧмсӧ: колӧ ӧтувтны крестьянаӧс да рабочӧйӧс.
Тайӧ тшӧктӧм сертиыс мунігӧн, уджалігӧн ми пыр венлім врагъясӧс рабочӧй да крестьяна революция дырйи, гражданскӧй война дырйи. Рабочӧй да крестьяна ӧтувтчисны аслас киӧ власьт босьтӧм вӧсна да капиталистъясӧс помещикъяскӧд шыбитӧм вӧсна. Сӧмын рабочӧй да крестьяна кост крепыда ӧтувтчӧм вӧсна ми вермим капиталистъясӧс, босьтім ас киӧ власьт, став муяссӧ, пабрик-заводъяссӧ.
Ӧні нӧ, капиталистъяссӧ венӧм бӧрын, колӧ оз крестьяналӧн рабочӧйяскӧдыс ӧтувтчӧмыс? Колӧ. Колӧ важ кодьыс жӧ ён ӧтувтчӧм.
Ми, рабочӧйяс да крестьяна, кӧсъям овны ас муын косясьтӧг, кӧсъям уджавны да лэптыны ассьыным овмӧс. Миян гӧгӧр ставыс буржуазнӧй государствояс. Власьтсӧ сэні важ мозыс на ас киас кутӧны помещикъяс, капиталистъяс. Тайӧ государствоясыс пыр дугдывтӧг лӧсьӧдчӧны война вылӧ, стрӧитӧны ыджыд военнӧй суднояс, пушкаяс, аэропланъяс, корсялӧны йӧзӧс виан ядӧвитӧй газъяс. Тайӧ государствоясыс да сэтчӧ пышйысь миян капиталистъяс оз вермыны синнаныс видзӧдны миянлысь Сӧвет государство. Найӧ зільӧны чышкыштны миянлысь рабочӧй да крестьяна власьт.
Со мый вӧсна колӧ ёна ӧтувтчыны миян Сӧвет государствоын рабочӧйяслы да крестьяналы.
Рабочӧй да крестьяна зільӧны лэптыны, бурмӧдны кӧзяйствосӧ, мед олӧмыс налӧн лоӧ кокньыдджык, бурджык, югыдджык. Миян государствоын кӧзяйствоыс кык пӧлӧс: видз-му уджалӧм да промышленносьт. Ӧтарас кӧзяйствуйтӧны крестьяна, мӧдарас рабочӧйяс. А став вылас кӧзяйствуйтӧ рабочӧйлӧн да крестьяналӧн ӧтувтчӧмыс — Сӧвет власьт.
Мый эськӧ лоӧ, рабочӧйясыс ли крестьянаыс кӧ торйӧдчисны мӧда-мӧдсьыс либӧ кутісны кӧ лёкысь падмӧдны ӧтувтчӧмсӧ? Рабочӧйясыс эськӧ колины сёян-юантӧг, пабрик-заводъяс вылас сырьёыс эз ло, рабочӧйяс кутісны тшыгъявны, пабрик-заводъяс сувтісны. Крестьяналы сэки эськӧ эз ло пабрик-заводса тӧвар, видз-му уджалан кӧлуй. Государствоыслӧн овмӧсыс эськӧ сэки торксис, государствоыс омӧльтчис. Сэки эськӧ эз кутны дыр видзӧдны миян врагъяс, пусь-пасьвартісны Сӧвет государство.
Рабочӧйяслӧн да крестьяналӧн зэв уна врагъяс. Медыджыд врагыс ӧні сылӧн — сиктъясса озыр йӧз: кулакъяс, кодъяс босьталӧны арендаӧ уна му норма вывтіыс да барыш босьтӧм кузя медалӧмӧн уджӧдӧны мукӧд гӧль крестьянаӧс либӧ кыдзкӧ мукӧд ногӧн озырмӧдчӧны йӧз спина вылын.
Кулакъяслы ёна оз во сьӧлӧм вылас ӧнія оласногыс. Миян законъяс серти, кулакъяс оз вермыны бӧрйыны ни бӧрйысьны, сійӧ праваыс налӧн абу. Миян законъяс дорйӧны гӧль крестьянаӧс, кодъяслы невӧляӧн лоӧ медасьны уджавны озыръяслы либӧ ассьыс мусӧ лоӧ сетны арендаӧн. Сиктса озыр йӧзлы колӧ, кыдзи и мукӧд капиталист государствоясын, мед законыс сӧмын вӧлі сулалӧ озыръяс дор, мед эськӧ озыръясыс киын вӧлі став власьтыс.
Со мый вӧсна сиктса озыр йӧз зільӧны жугӧдны рабочӧйяслысь, гӧль да шӧркоддьӧма олысь крестьяналысь ӧтувтчӧмсӧ. Найӧ быд ногӧн кыдзи-мый вермӧны падмӧдӧны ӧтувтчыныс рабочӧйясӧс крестьянакӧд: торкӧны кооперативса удж, тӧвар вузалігӧн-ньӧбигӧн либӧ налогъяс пукталігӧн кӧ кутшӧмкӧ ӧшыбка лоӧ, зільӧны пемыд гӧль крестьянаӧс сувтӧдны паныд Сӧвет власьт вылӧ да сідз водзӧ.
Ӧні медъёна миянлы колӧ рабочӧйяс да крестьяна кост крепыда ӧтувтӧм. Тайӧ ӧтувтчӧмас миян ставыс: государствоса овмӧс кыптӧмыс, ёнмӧмыс, асланым бура олӧмыс да кокньыдлань водзӧ мунӧмыс. Мед Ленин ёрт кулӧмлы кык во тырӧм бӧрын быдӧн аслыс шуас: менам бур олӧм, менам государстволӧн олӧм кутчысьӧ сӧмын рабочӧйяс да крестьяна ӧтувтчӧм вылын. Некор эн вунӧд тайӧ Ленин ёртлысь ыджыд тшӧктӧм!
