ШӦРКОДДЬӦМА ОЛЫСЬ КРЕСТЬЯНАКӦД ӦТВЫЛЫСЬ КУЛАКЪЯСЛЫ ПАНЫД

Ставсоюзса Коммунист партиялӧн 14-ӧд съездыс индаліс рабочӧй класслы туйяс, кыті налы колӧ мунны коммунист партия индалӧм серти крестьянакӧд ӧтувтчӧм кузя.

Став крестьянаыс абу ӧткодьӧсь. Сиктъясын крестьяна овмӧс сертиыс торъялӧны куим пельӧ: гӧль крестьяна, шӧркоддьӧма олысь крестьяна да кулакъяс. Рабочӧй класс тайяс вылӧ оз видзӧд ӧткодя. Медматын рабочӧйяс дінын, медъёна на дор сулалӧны гӧль крестьяна, медсясӧ нин батракъяс. Найӧ став сиктса олысьяс пиысь медъёна сулалӧны революция дор; найӧ медъёна отсалӧны рабочӧйяслы шӧркоддьӧма олысь крестьяна вӧсна кулакъяскӧд косясигӧн.

Сиктса гӧль крестьяна зэв на омӧликӧсь, ӧтувтчытӧмысь мӧда-мӧдныскӧд. Найӧ куш ас кежсьыс оз на вермыны водзсасьны кулакъяскӧд. Рабочӧйяслы лоӧ отсавны гӧль крестьяналы кулакъяскӧд водзсасьны. Рабочӧй да крестьяналӧн правительствоыс быд ногӧн отсалӧ гӧль крестьяналы. Сійӧ ӧтувтӧ гӧль крестьянаӧс коллективнӧй кӧзяйствоясӧ, артельясӧ, мӧда-мӧдлы отсасян комитетъясӧ, сӧветъясӧ, отсалӧ налы сьӧм удждӧмӧн да сідз водзӧ.

Гӧль крестьяна бӧрын матынджык рабочӧйяслы сулалӧны шӧркоддьӧма олысь крестьяна. Шӧркоддьӧма олысь крестьянаыс сиктын медуна. Ӧні сиктъясын кулакъяс кутісны юръяссӧ бара лэптыны, найӧ зільӧны шӧркоддьӧма олысь крестьянаӧс кыскыны асланьыс, сувтӧдны гӧль крестьяналы да рабочӧйяслы паныд. Сы вӧсна коммунист партия да сӧвет власьт зільӧны, мед эськӧ шӧркоддьӧма олысь крестьянаыс кутіс мунны ӧтлаын гӧль крестьянакӧд да рабочӧйяскӧд, а эз кулакъяскӧд. Вермам кӧ кыскыны шӧркоддьӧма олысь крестьянаӧс гӧль крестьянакӧд кооперативъясӧ, сэки шӧркоддьӧма олысь крестьяна кутасны мунны гӧль крестьяна да рабочӧйяс дор, кутчысясны коммунист партия уджӧ, социализм стрӧитан уджӧ.

Коммунист партиялӧн 14-ӧд съездыс шуис: шӧркоддьӧм олысь крестьянаӧс да гӧль крестьянаӧс пӧ кооперативъясӧ пыртӧм удж мунӧ зэв на омӧля. Колӧ пӧ быд коммунист партияса шленлы тӧждысьны кооперация ёнмӧдӧм вӧсна, видзӧдны, мед кооперативъясса уджыс муніс бура.

Коймӧд пӧлӧс йӧз сиктын кулакъяс. Коммунист партия да рабочӧй класс быд ногыс косясьӧ кулакъяскӧд. Коммунист партиялӧн 14-ӧд съезд шуӧ, кулакӧс пӧ позьӧ вермыны сӧмын сэк, кор ӧтувтам гӧль крестьянаӧс мӧда-мӧдыскӧд кулакъяслы паныд да кор гӧль крестьяна рабочӧйяскӧд кутасны уджавны ӧтвылысь шӧркоддьӧма олысь крестьянакӧд. Сідзи уджалӧмӧн шӧркоддьӧма олысь крестьяна оз нин кутны мунны кулакъяскӧд, сэки кулакъясыс кольӧны ӧтнаныс.

Со кутшӧм туйяс индаліс Коммунист партиялӧн 14-ӧд съездыс рабочӧйясӧс крестьянакӧд ӧтувтӧм кузя.

П. Г.