МЫЙ ШУИС КОММУНИСТ ПАРТИЯЛӦН ЦЕНТРАЛЬНӦЙ КОМИТЕТЫС КООПЕРАТИВСА ЭМБУР ЛОТАЙТӦМ ЙЫЛЫСЬ
Коми обласьт пасьта лунысь лунӧ кутіс содны кооперативъясысь эмбур лотайтӧм. Пӧшти ӧд быд лун кывлылан: приказчик пӧ абу судзсьӧма, правленньӧ пӧ лотайтӧма кооперативса эмбурсӧ. Лотайтӧмаӧсь абу сӧмын миянын; став Сӧвет республикаяс пасьтаыс сиктса кооперативъяс омӧля кутісны уджавны.
Сідз водзӧ кежлӧ кольны, дерт, оз позь. Колӧ мыйкӧ вӧчны, колӧ бырӧдны эмбур лотайтӧмъяссӧ.
Коммунист партиялӧн Центральнӧй Комитетыс со мый шуис:
1. Сиктса кооперативъясын эмбур лотайтӧмъяс да гусясьӧмъяс со мый вӧсна овлӧны: кооперативса шленъяс омӧля на кооперативса уджсӧ тӧдӧны, уна на шлен миян оз волывлыны собранньӧяс вылӧ, правленньӧясас бӧрйӧны кутшӧмсюрӧ йӧзӧс. Водзӧ кежлӧ быд кооперативса шленлы колӧ матысмыны кооперативса удж бердас, колӧ, мед быд шлен собранньӧяс вылӧ воліс, правленньӧлысь да ревизионнӧй комиссиялысь уджсӧ тшӧкыдджыка видлаліс.
2. Милициялы да суддяяслы колӧ регыдджык видлавны кооперативса эмбур лотайтӧм йылысь делӧяссӧ да ёнджыка мыжаяссӧ мыждыны.
3. Уналаын кооперативса шленъяс эмбур лотайтысьяссӧ общӧй собранньӧ вылын ичӧтика видыштасны да и прӧститасны либӧ судзсьытӧмсӧ чинтасны да лӧсьӧдасны срокъяс — куим-квайт тӧлысь чӧж мынтыны. Водзӧ кежлӧ колӧ пырысьтӧм-пыр жӧ мыжаяссӧ сетны судӧ.
4. Сэсся лотайтӧмъяс овлӧны, велӧдчӧм йӧз оз тырмы да, сы вӧсна. Колӧ та йылысь ёнджыка мӧвпыштны да кӧні позяс лӧсьӧдавны курсъяс, приказчикъясӧс, тшӧтӧводъясӧс велӧдны. Правленньӧясӧ колӧ бӧрйыны уджавны кужысь йӧзӧс.
5. Сідзжӧ колӧ кооперативъяс инструкторъяслы тшӧкыдджыка сиктса кооперативъяслысь уджсӧ видлавны да индавны налы, кыдзи колӧ уджавны.
6. Колӧ контрольнӧй комиссияяслы да инспекциялы чорыдджыка кутчысьны эмбур лотайтысь коммунистъяс дінӧ.
7. Кооперативъясын уджалысь йӧзлы профсоюзъяс пыр колӧ тшӧтш босьтчыны бырӧдны лотайтӧмъяссӧ да профсоюзса шленъясӧс, мыжаӧсь кӧ найӧ, чорыда мыждыны.
8. Оз позь кооперативса сьӧм кытчӧсюрӧ видзны, прихода-рӧскода сметаяс колӧ видлавлыны общӧй собранньӧяс вылын. Кооперативын кӧ мыйкӧ неладнӧ лоӧ, колӧ тшӧтш мыждыны ревизионнӧй комиссияяссӧ, сэк регыдджыка бырӧны лотайтӧмъясыс да гусясьӧмъясыс.
9. Коммунист партиялы колӧ быд лотайтӧм ёна тӧдмавны, мед водзӧ кежлӧ тӧдан, мый вӧсна лотайтӧмъясыс кооперативъясын овлӧны.
Со кыдзи коммунист партия тшӧктӧ бырӧдны кооперативса эмбур лотайтӧмъяссӧ да гусясьӧмъяссӧ. Колӧ быдӧнлы тайӧ тшӧктӧмсӧ вӧчны быдлаын.
