КОКНЬӦД ГӦЛЬ КРЕСТЬЯНАЛЫ

Недоимка гӧль крестьяналысь оз босьтсьы

1923−24 бюджетнӧй воын миян обласьтын крестьяналысь босьтсьӧ вӧлі содтӧд сельхозналог бердӧ вӧлӧсьтса сбор. Тайӧ сборыс вӧлі босьтсьӧ вӧлӧсьтувса овмӧс нуӧдӧм вылӧ. Тайӧ сборсӧ миян обласьтын унаӧн эз мынтыны. Сы вӧсна коли вель уна недоимка. Унджыкыс недоимка улас, дерт, сюрины гӧль кӧзяйствояс. Уна недоимщик лои и шӧркоддьӧма да озыра олысьяс пӧвстын.

Кымын дыр нюжалі, сымын сьӧкыдджык гӧль крестьянаыдлы мынтыны лои недоимкатӧ. Воысь воӧ ӧд колӧ мынтыны налогтӧ.

Медым, ӧти-кӧ, кокньӧдны тавося налог мынтӧмсӧ гӧль овмӧса крестьяналы, мӧд-кӧ, медым кадын мынтісны тавося налогсӧ, обласьтувса исполнительнӧй комитет декабрын 21-ӧд лунӧ шуис ӧткымын сикас кӧзяйстволысь не босьтны вӧлӧстнӧй сборысь лоӧм недоимкасӧ, кӧть сэсся мый ыджда сійӧ недоимкаыс.

Обисполком шуис не босьтны татшӧм недоимкасӧ со кутшӧм кӧзяйствояслысь: 1) омӧлик да гӧль кӧзяйствояслысь, дӧва баба да сирӧта кӧзяйствояслысь, гражданскӧй да сар войнадырся инвалид семьяяслысь, абу кӧ сэні уджавны вермысь мужчина да вӧлыс; 2) причча суӧм кӧзяйствояслысь, выль кӧзяйствояслысь, эз на кӧ найӧ удитны ёнмыны, гӧрдармееч семьяяслысь, совпартшколаясын, рабфакъясын, коммунистическӧй университетъясын дай мукӧд гырысь школаясын велӧдчысь семьяяслысь.

Шӧркоддьӧма кӧзяйствояслы вӧлӧстнӧй сборысь недоимка мынтӧм вылӧ обисполком сетіс срок — ӧти тӧлысь. Сійӧ тӧлысьнас недоимка вылӧ пеня оз кай.

Бура олысь, озыр кӧзяйствояслы недоимка мынтӧм вылӧ сетӧма сроксӧ кык вежон кежлӧ.

Со кутшӧм ыджыд кокньӧд сетӧма лои гӧль крестьяналы. Тшӧтш кокньӧдӧма недоимка мынтӧмсӧ шӧркоддьӧма крестьяналы — сетӧма пеня босьттӧг тӧлысся срок. Колӧ крестьяналы мынтыны тавося сельхозналог регыдджык, коді эз на удит мынтыны.