ТУРНЕПСӦН СКӦТӦС ВЕРДІ — ЙӦЛЫС СОДІ

Коми крестьянинлӧн видлӧг.

«Югыд Туй» велӧдіс

Колян тулыс ме кӧдзлі турнепс (мӧс сёркни). Кӧдзи «Югыд Туй» газетын индӧм моз. Мӧд пӧв гӧрӧм мысти ме окучникӧн лэпті мусӧ ӧтар-мӧдарсяньыс гӧрыштӧм пластъяс вылас (сделал гребни). Сэсся сэтчӧ, лэптӧминас (на гребнях), бедь помӧн вӧчи посньыдик бӧрӧздаяс вершӧк джын джуджда. Бӧрӧздаас бутылкаысь розя пробка пыр кӧдзи турнепссӧ. Ме кӧдзи сійӧс куимлаӧ ичӧтикаӧн. Ӧтилаӧ кӧдзи кӧтӧдӧм кӧйдысӧн. Кӧтӧдӧм кӧйдысыс чужи шоча, кос кӧйдысыс — тшӧкыда. Гожӧмнас ме кӧдзасӧ весавлі дай мудйылі (мусӧ лэптылі) кык пӧв. Весалісӧ коканӧн, мудйисӧ окучникӧн.

Урожайыс эз ӧткодь во. Лыа-сёйӧд му вылын (суглинок) воис медгырысь, сӧмын сэтчӧ ме кӧдзлі кӧтӧдӧм кӧйдыснад да, шоч воис. Ме пола вӧлі турнепс тшыкӧмысь да, босьті сентябр тӧлысьын: куим пӧрйӧ, тӧлысь пуксигас, шӧрас дай помас.

Турнепс корйыс тшыкӧ регыдджык. Сы вӧсна ме верді сійӧс медвойдӧр. Сета вӧлі суткинас кык пӧрйӧ. Сэки кӧть и мӧсъяс вӧлі ветлӧны на пӧскӧтина вылын, турнепс корйӧн вердӧмла йӧлыс соді.

Сентябр 20 лунсянь ме куті быд лун сетавлыны турнепссӧ ӧтчыд лун шӧр кадын. Вундала вӧлі сійӧс косаӧн гырысь кусӧкъясӧн. Мӧсъясыд эськӧ йирӧны турнепстӧ зэв бура и, быдсанас кӧ сетан.

Медым тӧдмавны, мый бурыс лоӧ турнепснас вердӧмысь, ме ачым вӧлі быд лун сёӧда сійӧн мӧсъясӧс. Лун кежлас сета вӧлі ӧти мӧслы 30 пунт. Мӧсъяслы сэтшӧма кажитчис турнепсыд, мыйӧн аддзасны, пыр вӧтчасны ме бӧрся.

Турнепсӧн вердӧмӧн менам мӧсъяслӧн йӧлыс соді кык мында. Госыс йӧвлӧн эз жӧ чин.

Турнепс менам тырмис 1 тӧлысь, октябр 20-ӧд лунӧдз. Медбӧръясьыс турнепсӧн сёӧдӧм бӧртисьыс мӧд луннас йӧлыс пыр и кутіс чинны, чинны зэв ӧдйӧ. Медбӧрын 5 кринча пыдди кутісны лысьтыны сӧмын 2 кринча да джын.

Ӧти асылӧ кӧзяйка шуӧ меным: «Сюраньыд тай, тыдалӧ, абу тырсявлӧма. Ме чайті, сійӧ декабр тӧлысьын куканясяс нин-а». — «Мыйла сідзи думайтан?» — юала ме. «Йӧлыс сылӧн, чинӧм пыдди, содны кутіс да». Тайӧ сёрниыс лои лун вит мысти кымын турнепснас вердны заводитӧмсянь. Турнепс бырӧм бӧрти Сюрань коймӧд рытнас жӧ эз сет йӧвсӧ ӧти пань весиг.

Сідзжӧ менам сусед ньӧбис турнепссӧ школаса град вылысь. Сылӧн мӧсъясыслӧн сідзжӧ йӧлыс соді турнепснас вердігӧн.

Крестьяна, босьтчылӧй унджыкӧн кӧдзны локтан тулысын турнепс! Кӧйдысыс зэв донтӧм. Кыдзи кутас воны, мый выльтор аддзанныд, гижӧй «Коми Сиктӧ».

Крестьянин Карманов.