ӦТУВТӦЙ ЭМБУРТӦМА КРЕСТЬЯНИНӦС ШӦРКОДДЬӦМАКӦД
Сӧветскӧй Союз ас ӧбликнас крестьянскӧй. Бур сям пуктӧмӧн крестьяна да рабочӧй кост Сӧвет государство сӧмын вынмӧдчӧ. Сы понда коммунист партия, мыйӧн на чужис, вывті пыдди пуктіс крестьянаӧс. Ленин ёрт вӧлі висьтавлӧ: революция Россияын сяммас, вермас, кор рабочӧй да крестьянин ӧтувтчасны. Збыльысь, вӧчисны революция рабочӧйяс да крестьяна ӧтувтчӧмӧн. Ӧні ӧтувтчӧмӧн жӧ сӧмын найӧ вермасны кутны Сӧвет Союзӧс.
Коммунист партия та йылысь некор оз вунӧд. Кузя муніс ӧні коммунист партиялӧн 14-ӧд съезд. Мый сэні вӧлі медыджыд сёрниыс? Кыдзи дорны йитӧд крестьяна да рабочӧй кост. Кыдзи ӧтувтчӧмӧн кыпӧдны кӧзяйствонымӧс.
Центральнӧй Комитетлӧн генеральнӧй секретарыс Сталин ёрт висьталіс коммунист партияса Центральнӧй Комитетлысь тӧлк нуӧдӧмсӧ крестьяна йылысь. Съезд та вылӧ шуис: колӧ водзӧ кыпӧдны сиктса овмӧс: бурмӧдны видз-му уджалӧм машинаясӧн, видз-мусӧ лӧсьӧдӧмӧн (землеустройствоӧн). Колӧ видз-му уджалӧмсӧ отсалысь тӧвариществояс вылӧ бурджыка видзӧдлыны.
Овмӧс кыпӧдӧмӧн сиктъясын торъялӧны, лоӧны кулакъяс. Кымын водзӧ, сымын найӧ кутасны босьтны ас кипод улас шӧркоддьӧма крестьянаӧс. Кулакыд гӧль мортлы абу друг. Сы бердын кӧ лоӧ ещӧ шӧркоддьӧма крестьянин, сэки гӧльыд пикӧ воас.
Колӧ сиктса гӧль йӧзлы партияӧн да государствоӧн отсалӧмӧн ӧтувтчыны ас костаныс дай шӧркоддьӧма крестьянакӧд. Ӧтувтчыны ӧтувъя кӧзяйствоясӧ, артельясӧ, тӧвариществоясӧ, кооперативъясӧ, крестьяна комитетъясӧ да сӧветъясӧ. Та бӧрти некутшӧм кулак оз вермы йиджны гӧль йӧзлы. Тадзи гӧль крестьяна регыдджык вермасны мӧда-мӧдныслы отсасьӧмӧн кыпӧдны ассьыныс олӧмсӧ.
Шӧркоддьӧма крестьяналы бурджык ӧтувтчыны гӧль крестьянакӧд. Кулак шӧркоддьӧмаӧс кутӧ оружйӧ пыдди, а гӧль крестьянин лыддьӧ сійӧс другӧн, ӧтув уджалысьӧн.
Татшӧм сёрни гӧгӧр муніс удж съездлӧн. Тадзи колӧ матыстчыны уджӧн крестьяна бердӧ. Быд коммунистлы колӧ ӧні босьтчыны гӧль да шӧркоддьӧма крестьяналы висьтавлыны та йылысь.
Йитӧй ӧтувъя олӧм гӧль крестьяналысь шӧркоддьӧмакӧд!
Гӧль крестьяна, эмбуртӧмъяс сиктын — рабочӧйяслы, Сӧвет правительстволы, коммунист партиялы ыджыд вын.
Шӧркоддьӧма крестьяна гӧльлы-эмбуртӧмалы союзник.
