МЫНТӦЙ ВИДЗ-МУ ВОТ
Первоя видз-му вот мынтыны срок воис, но сьӧмыс мында колӧ вӧлі мынтыны январ 1 лун кежлӧ эз тыр, муртса чукӧрмӧ джынйыс. Январ 1-ӧд лун кежлӧ колӧ вӧлі чукӧртны джынсьыс этшаджык (40 прӧч.), а чукӧрмис сӧмын джынйыслӧн джынйыс (20 прӧч).
Та понда миян олӧмыс зэв ёна вермас падмыны. Видз-му вот мунӧ государствоса казнаӧ, джынйыс кольӧ обласьтӧ. Рӧскод арталігӧн Сӧвет правительство дай миян обласьтувса власьт арталӧны, мыйта воӧ сылы сэтшӧм кад кежлӧ сьӧм. Сы серти сійӧ лӧсьӧдӧ обществолысь удж. Босьтам ассьыным обласьттӧ. Обласьтлӧн доходыс таво петіс куим миллион шайт сайӧ (3125747). Та серти лӧсьӧдӧма и рӧскод: йӧз югдӧдӧм вылӧ, видз-му лӧсьӧдӧм вылӧ, дзоньвидзалун йӧзлысь видзӧм вылӧ, торйӧдӧма доходысь сэсся сэсь жӧ и вӧлӧсьтъяслы да сідз водзӧ.
Мый лоас, огӧ кӧ ми вермӧ кадӧн чукӧртны доходъяссӧ обласьтувса кассаӧ? Сувтас став уджыс обласьт пасьта. Сувтас и вӧлӧсьтувса удж. Тавосянь быд вӧлӧсьт кутӧ ас кипод улас вӧлӧсьтувса олӧмсӧ. Сылӧн эм сідзжӧ рӧскод-доход. Медыджыд вӧлӧсьтлӧн доходыс чукӧрмӧ видз-му вотысь, вотысь жӧ вӧлӧсьтъяс босьтӧны рӧскод вылӧ. Оз кӧ чукӧрмы кад кежлӧ вот, оз вермы вӧлӧсьтыс босьтны рӧскодъяс вылӧ кадӧн сьӧм.
Крестьяналӧн быдӧнлы колӧ бурджыка думыштны вот мынтӧм йылысь. Оз кӧ крестьяна мынтыны вот кор колӧ, срок кежлӧ, сэк налы лоӧ мынтыны унджык. Бурджыка колӧ мӧвпыштны и исполкомъяслы. Оз кӧ вермыны перйыны вӧлӧсьтса исполкомъяс кадӧн вот, сэк налы лоӧ эновтлыны обществоса удж вӧлӧсьтын, сэк найӧ лоӧны мыжаӧсь обласьтса, Совет Союзса удж сувтӧдӧмысь. Дерт, оз уна сет сьӧм видз-му вот, но кадӧн мынтӧмысь миян кӧзяйстволы сійӧ сетӧ зэв ыджыд отсӧг.
Видз-му вот перйӧм вылӧ колӧ бурджыка видзӧдлыны партиялы.
Колӧ висьтавны быд крестьянинлы, кутшӧм омӧль вот мынтытӧмысь аслыс, вӧлӧсьтлы, обласьтлы дай Сӧвет Союзса кӧзяйстволы. Крестьянаыс кӧ гӧгӧрвоасны тайӧс, сэк найӧ кутасны бокисянь казьтывтӧг кадӧн мынтыны вот.
Вӧлӧсьтса партийнӧй ячейкаяслы колӧ ӧні жӧ босьтчыны тайӧ удж бердӧ, колӧ содтыштны неуна зільӧмсӧ. Тадз кӧ кутас мунны водзӧ вот перйӧм удж, миян кӧзяйство стрӧитӧм вермас падмыны.
