***

Бура помнита: вӧлі 2009 во, тӧв пом. Шондіыс бергӧдчис тулыслань да прамӧй югыда нин ворсӧдчис лӧз енэжын. Регыд мысти и март тӧлысь пуксис... Коркӧ тувсов лунъясас пырис ме ордӧ быдӧнлы тӧдса коми журналист Алина Тимушева (кулӧмдінса поэт Эдуард Тимушевлӧн чойыс) да и висьталӧ:

— Регыд ӧд миян земляк Ӧльӧксан Лужиковлӧн чужан лун. Буретш нелямын вит арӧс эськӧ тырис март 19 лунӧ. Но Енмыс тай вежӧра мортыдлы дженьыдик нэм сетлӧма. Муртса и олыштіс вӧльнӧй светас. Ӧльӧксанлӧн чужан лун кежлас ме дасьта Коми радиоын сы йылысь казьтылан передача, шусьӧ: «Тайӧ му вылас чужан да бытьӧн ӧд ов». Сэні юргасны Лужиковӧн гижӧм да лыддьӧм кывбуръяс, сёрнитас литература туялысь Олег Уляшев. Гашкӧ, и тэ кыв-мӧд шуан Саша йывсьыс. Коркӧ ӧд ӧтлаын на «Би кинь» журналад уджавлінныд.

— Мыйла нӧ ог, — шуи сэки Алиналы. — Саша кодь поэтыд миян сё вонас ӧтчыд чужлӧ. А кор пыралан гижнысӧ?

— Аски лун шӧр гӧгӧр и кежала, — небыдика нюмъёвтіс воча Эдиклӧн чойыс.

Алина Тимушева кутіс ассьыс кывсӧ да аскинас кежаліс ме ордӧ. Сёрнитӧма писькӧс да енбиа аньыд и Олег Уляшевкӧд. Нӧшта чукӧртӧма-корсялӧма «Коми гор» радио фондысь Лужиковлысь кывбуръяс, кодъясӧс лыддьӧ ачыс, Кекур грездын чужӧм-быдмӧм енбиа морт...

Ӧльӧксанлӧн чужан лунӧ и юргис радио пыр Алина Тимушеваӧн дасьтӧм-лӧсьӧдӧм нималана поэтӧс казьтылана передачаыс. Унасянь кывлі: абу пӧ лёк артмӧма, ловтӧ вӧрзьӧдысь, вежӧртӧ кыпӧдысь-ышӧдысь. Недыр мысти Алина бара на пыраліс Печать керкаӧ да козьналіс меным тайӧ уджтассӧ, быттьӧ тӧдіс, быттьӧ сьӧлӧмнас кыліс — ачыс абу жӧ кузь нэма...

Март тӧлысьӧ шуим вӧзйыны «Войвыв кодзув» журнал лыддьысьяслы Алина Тимушеваӧн дасьтылӧм коркӧя сёрнисӧ. Таво Александр Лужиковлы тырис эськӧ 50 арӧс...