РАДИО ДОР СУЛАЛЫСЬ ЙӦЗ ӦТУВТЧӦМ ЙЫЛЫСЬ

Быд коми сиктын колӧ лӧсьӧдны радио дор сулалысь йӧз чукӧръяс (кружки радиолюбителей). Радио дор сулалысь йӧз ӧтувтчӧны сы понда, мед ӧтчукӧрӧн, ӧтвыв позис ёнджыка тӧдмавны да велӧдны быд боксянь радиосӧ да сылысь уджалӧмсӧ. Радио дор сулалысь мортлы аслыс колӧ ёна тӧдмавны радиосӧ дай висьтавны сы йылысь мукӧдлы. Радио тӧдмалан удж дорӧ ӧтувтчӧмӧн уджалысь йӧз, ӧти-кӧ, югдӧдӧны асьнысӧ, мӧд-кӧ, ёна отсалӧны Сӧвет власьтлы. Сӧвет власьтлы зэв колӧ, мед эськӧ унджык йӧз радиосӧ тӧдісны гӧгӧрбок да кужисны сійӧн вӧдитчыны. Мукӧд государствоясын радио бердас ӧтувтчӧмаӧсь зэв нин унаӧн, радиоыс налӧн паськалӧма зэв нин ёна. Миян оз ков кольччыны наысь, колӧ тайӧ уджын водзмӧстчыны быдӧнлы.

Быд сиктын вит мортысь позьӧ лӧсьӧдны радио дор сулалысь йӧз чукӧр. Быд крестьянин, коді пырӧ сійӧ чукӧрӧ, мынтӧ ассяньыс пыригас сӧмын 10 ур, сэсся быд тӧлысь мынтӧ взнос куим урӧн (3 коп). Взнос мынтӧм зэв кокни — позьӧ пырны быд мортлы. Радио дор сулалысь йӧз чукӧр сиктын уджалӧ лыддьысян керкаын. Сэтӧн жӧ сійӧ лӧсьӧдӧ аслыс радио пельӧс да чукӧртӧ сэтчӧ быдтор радио йывсьыс.

Ас костсьыс чукӧр бӧрйӧ морт куим кымынӧс юралысь-индалысьясӧс (бюро). Уджыс чукӧрлӧн со кутшӧм: а) чукӧртны сьӧм да судзӧдны радио йылысь гижӧм нигаяс, газетъяс дай медся коланторсӧ — радио аппаратъяссӧ, б) нигаяс-газетъяс серти ӧтчукӧрӧн лыддьӧмӧн да сёрнитӧмӧн тӧдмавны, мый сійӧ радиоыс, кыдзи сійӧ уджалӧ да кыдзи сійӧс лӧсьӧдны аслыд; в) чукӧртны радиобердса удж дорас унджык йӧзӧс да отсавны налы тшӧтш тӧдмавны радиосӧ, петкӧдлыны налы быд бок да висьтавлыны радио йылысь; г) кор лоӧ сиктын лӧсьӧдӧма кывзан радиоыд, быд лун кывзыны, мый кытісянь висьталӧны радионас, кутшӧм кытысь сёрни-висьтъяс мӧдӧдалӧны, кутшӧма шыыс кылӧ; д) вӧчавны сиктъясын радио рытъяс да мукӧд сэтшӧмтор.

Быд мортлы колӧ зіля отсавны лӧсьӧдны радио быд сиктын. Быд мортлы, томлы и пӧрысьлы, колӧ пырны радио дор сулалысь йӧз чукӧрӧ да ӧтув кыпӧдны сылысь уджсӧ. Ӧтув велӧдчӧмӧн да радио тӧдмалӧмӧн колӧ югдӧдны асьнымӧс.

Ӧтувтчӧй, коми йӧз, радио дор сулалысь йӧз чукӧрӧ!

А. А. Попов.

РЕДАКЦИЯСЯНЬ: «Коми Сикт» мӧд №-ын печатайтам статья — «Кыдзи коми сиктын лӧсьӧдны радио».