НЫВБАБАЯС, ВЕЛӦДЧӦЙ СТАВНЫД!
Уна морт на миян обласьтын велӧдчытӧм. Медуна велӧдчытӧм нывбабаяс пытшкын: быд вит велӧдчытӧм пиын нёльыс нывбаба. Нывпоснилы войдӧр некодлы вӧлі шуны: мун пӧ тэ, нылӧ, школаӧ да ассьыд этша синтӧ восьты. Вӧзйысьны кӧ кутас нылыд школаӧ, бать-мамыд горӧдасны: кутшӧм пӧ тэныд школаӧ ветлӧм — паськӧмъястӧ кисьтны; эм на тэныд вылӧ печкан пӧвйыд да нянь быглялан скалӧыд. Немтор тӧдтӧг нэм чӧжыс и лоас овны.
Нывбабаӧс некутшӧм общественнӧй уджӧ эз сибӧдлыны, некытчӧ эз бӧрйывны найӧс.
Октябрса революция нывбабаӧс мездіс. Ӧні нывбабаяслӧн мужикъяскӧд праваыс ӧтыдждаӧсь, ӧткодьӧсь. Ӧні ті, нывбабаяс, вермад бӧрйысьны Сӧветъясӧ, кооператив правленньӧӧ шленъясӧ, вермад бӧрйыны общественнӧй удж вылӧ кодӧс тіянлы колӧ, кодӧс чайтад бура уджаліг.
Нывбабаяс, медым кужны сетӧм праванас пӧльзуйтчыны, бур босьтны, колӧ войдӧр велӧдчыны, тӧдны грамота. Сӧмын грамотнӧй морт регыдджык гӧгӧрвоас бура либӧ омӧля вӧчӧм да лӧсьӧдас уджсӧ, грамотнӧй морт кокниджыка корсяс правасӧ да быд удж вылӧ ёнджыка сибалас. Онӧ кӧ велӧдчӧй, пыр лоас юасьны-висьтасьны, пыр синтӧм морт кодьӧсь лоанныд.
Нывбабаяс, энӧ вунӧдӧй, ті ӧд мамъяс водзӧ быдмысь, водзӧ удж нуӧдысь челядьлӧн. Велӧдчытӧм мам бура да дзоньвидзаӧн челядьӧс быдтыны оз куж. Уна посни челядь деревняясын видзны кужтӧмла кулӧны ичӧт вывсьыс. Оз кӧ эськӧ сэтшӧма кулавны найӧ, ён отсӧг вӧлі насянь Сӧветскӧй государстволы. Велӧдчытӧм мам оз гӧгӧрво ни аддзы велӧдчӧмысь бурсӧ. Сы вӧсна оз зіль сійӧ велӧдны и челядьсӧ, пыр индӧ найӧс кутшӧмсюрӧ гортса удж вылӧ. Гӧгӧрвоысь мамыд челядьтӧ кокньӧдӧ сійӧ уджсьыд да школаӧ найӧс ыстӧ. Велӧдчигӧн ӧтитор-мӧдтор индалӧ налы, отсасьӧ аслас тӧдӧмӧн.
Велӧдчытӧм нывбабаыд весиг скӧттӧ оз куж бура быдтыны да видзны. Видз-му уджалӧмтӧ оз жӧ бурмӧд. Мӧвпалӧ, таысь кындзи мӧд ногӧн сэсся пӧ оз и позь уджавныс. Велӧдчӧм мортыд эновтчӧмнад оз нин ов. Сійӧ лыддяс, кыдзи мукӧдлаын уджалӧны, кыдзи найӧ кокньыдджыка уджалӧмӧн ыджыд барыш босьтӧны. Лыддяс дай ачыс ыштас на ногӧн уджавны.
Велӧдчӧй жӧ, крестьянкаяс, шыбитӧй ас вывсьыд пемыдлунтӧ. Эновтлӧй гортса уджтӧ час-мӧд кежлӧ да ветлӧ школаӧ. Сӧветскӧй правительство ӧні ёна тіянӧс велӧдӧм вӧсна мырсьӧ: лӧсьӧдалӧ быд сиктӧ гырысьяслы велӧдчан школа.
М. Титова.
