ЭН ВУНӦД АССЬЫД ЫДЖЫД УДЖТӦ, СЕЛЬКОР ДРУГ!

Миян газетъяс: «Югыд туй» да «Коми сикт» — крестьяналӧн газетъяс. Сэні пыр гижӧны крестьяна олӧм йылысь, вӧлӧсьтувса сӧветъясын, сиктса кооперативъясын, школаясын да мукӧд сиктса учрежденньӧясын. Сэсся газетъясын пыр овлӧны статьяяс видз-му уджалӧм йылысь, скӧт видзӧм-вердӧм йылысь да мукӧд пӧлӧс коланторъяс йылысь.

Сідзнад миян газетъяс кыдз вермӧны отсалӧны крестьяналы, кыдз вермӧны кокньӧдӧны сылысь уджсӧ да югдӧдӧны олӧмсӧ. Сӧмын мед гижӧдъяс эз вошны весьшӧрӧ, колӧ лӧсьӧдны сідз, мед эськӧ газетъяс веськалісны крестьяна киӧ, мед паськалісны коми сиктъясын.

Газетъяс миян зэв на омӧля паськалӧны сиктъясын, шоч крестьянин на судзӧдӧ газеттӧ. Уна сиктъясӧ на миян газетъяс оз ньӧти судзӧдны, мукӧд коми сиктъясас оз на тӧдны, кутшӧм газетъяс петӧны Сыктывдінкарын, абу на аддзылӧмаӧсь «Югыд туйсӧ» да «Коми сиктсӧ». Тадзинад водзӧ кежлӧ, дерт, вӧчны оз позь, колӧ газетъяссӧ паськӧдны коми сиктъясын, коми крестьяна пиын.

Кыдзи эськӧ тайӧ уджсӧ лӧсьӧдны? Коді эськӧ вермас отсавны миянлы газет сиктъясӧ паськӧдны?

Сиктъясын миян эм ыджыд отсасьысь, ёна кокньӧдӧ миянлысь уджсӧ сійӧ, индӧ миянлы туй — кыдз-мый колӧ газетъясын гижны крестьяналы коланторъяссӧ. Сійӧ отсасьысьыс миян, сійӧ другыс — селькор. Селькор миянлы отсалас и газет сиктӧ паськӧдны, Коми обласьт пасьта миян эм кыксё селькор. Найӧ эмӧсь быд пельӧсын. Шоч вӧлӧсьтын абу нин селькорыд. Селькорыс и вермас отсавны миянлы паськӧдны сиктъясӧ газетъяс. Селькоръяс миян ставыс крестьяна пӧвстысь, ставыс асьныс крестьяна. Найӧ гижӧны миян газетӧ сиктса олӧм йылысь, найӧ лыддьӧны газетъяс миянлысь. Тӧдӧны, кӧні газет лэдзӧны, кутшӧм доныс газетыслӧн. Селькор вермас газет йылысь висьтавны крестьяналы, вермас ачыс чукӧртны газетъяс вылӧ гижсьысьяссӧ. Тайӧ уджыс селькоръяслӧн оз прӧста ло, оз вош налӧн газет вӧсна тӧждысьӧмыс.

Селькор друг, эн вунӧд конкурс йылысь, паськӧд газетъяс сиктъясын, чукӧрт газетъяс вылӧ гижсьысьясӧс. Тэ верман воны тӧлӧдчан машина, либӧ плуг, либӧ мукӧдтор.

Селькоръяслы быдлаын колӧ ёна зільны паськӧдны коми газетъяс коми крестьяна пиын. Сэки миян газетъяс ёнмасны, сэки ми вермам лӧсьӧдыштны кытсюрӧ газетсӧ, мед крестьяналы дзик быдтор гӧгӧрвоана вӧлі.

Эн жӧ вунӧд ассьыд ыджыд уджтӧ, селькор друг!

Н. К.