МЫНТӦЙ СЕЛЬХОЗНАЛОГ СРОК КЕЖЛӦ

Сельхозналог мынтӧмлы медводдза срокыс (январ 1-ӧд лун) зэв нин матын. Сӧмын коли кык вежон. Тайӧ кад кежлас быд коми крестьянинлы колӧ мынтыны став налогсьыс 40 прӧчентсӧ (быд 1 шайт вылӧ 40 ур), став обласьт пасьтаысь колӧ чукӧрмыны 85.800 шайт.

Тӧлысь войдӧр кежлӧ медводдза срокӧдзыс — декабр 1-ӧд лун кежлӧ — сельхозналогсӧ став обласьт пасьта мынтӧма сӧмын на 19.630 шайт да 61 ур — сӧмын 22,88 прӧч. Пыр кӧ тадзи кутасны крестьяна мынтыны сельхозналогсӧ, медводдза срок кежлас пайсӧ сельхозналоглысь став пыддиыс (100 прӧч.) вермас чукӧртны сӧмын 30−35 прӧч.

Тадзи крестьяналы водзӧ оз позь. Колӧ ёнджыка босьтчыны сельхозналог мынтӧмас. Медым чукӧртны став 40 прӧчентсӧ вося сельхозналоглысь срок кежлӧ, колі эськӧ мынтыны декабр 1-ӧд лунсянь 2.200 шайт гӧгӧр быд лун. Сӧмын быд лунсӧ та мынданас ӧнӧдз на эз мынтыны. Сідзкӧ срокӧдзыс кольӧм тайӧ кык вежоннас колӧ чукӧрмыны сельхозналоглы быд лун 3000 шайтӧн кымын, гашкӧ и унджыкӧн на.

Таво крестьяналы норасьны сельхозналогсӧ мынтыны сьӧкыдлун вылӧ торъя нинӧм. Таво воддза вояс серти налог мынтӧмсӧ крестьяналы ёна кокньӧдӧма. Ӧти-кӧ — налогсӧ чинтӧма колян во серти вель уна, мӧд-кӧ — таво колян во серти воис бур урожай. Сэсся колян во серти крестьяналы водзджык сетӧма окладнӧй листъяс, медым найӧ кокньыдджыка вермисны чукӧртны сьӧмсӧ налог вылас, мынтан сроксӧ нюжӧдӧма. Колян во медводдза срокыс вӧлі декабр 1-ӧд лун, таво январ 1-ӧд лун. Колян во крестьяна норасьӧны вӧлі мынтан срокъяссӧ вешталӧм вылӧ, вежлалӧм вылӧ. Таво государство тшӧктіс быдлаын лӧсьӧдны чорыд срокъяс. Сійӧ срокъяссӧ вежлавны некутшӧма оз позь. Тайӧн государство муніс паныд крестьяналы. Сідзкӧ и крестьяналы колӧ локны паныд государстволы — мынтыны налогсӧ срок кежлӧ.

Мыйла государстволы колӧ срок кежлӧ сельхозналогсӧ мынтӧмыс? Государствоыд ӧд ассьыс уджсӧ водзвыв лӧсьӧдӧ, водзвыв удж вылас рӧскодъяссӧ индалӧ налог срок кежлӧ босьтӧм вылӧ надеяӧн. Таво тӧв государство сельхозналогысь воӧм сьӧм вылӧ чайтӧ уна гырысь удж нуӧдны. Сельхозналогысь жӧ государствоӧн лоӧ сетӧма отсӧгъяс крестьяналы овмӧснысӧ кыпӧдӧм вылӧ быдсяма тӧвариществояс пыр. Оз кӧ во став колан пайыс сельхозналоглӧн срок кежлӧ, сэки государстволы лоӧ сьӧкыд нуӧдны ассьыс индӧм уджъяссӧ. Сэсся ӧд таво сельхозналогысь джынсӧ сетӧма вӧлӧсьтувса бюджетӧ. Оз кӧ ло мынтӧма крестьянаӧн налогсӧ срок кежлӧ, волисполком оз вермы нуӧдны кадын ассьыс индӧм уджъяссӧ вӧлӧсьтувса овмӧс кыпӧдӧм кузя. Со мый вӧсна колӧ мынтыны сельхозналог срок кежлӧ, со кутшӧма колӧ государстволы дай аслыныс крестьяналы срок кежлӧ налог мынтӧмыс.

Коми крестьяна! Быдӧн мынтӧй сельхозналогтӧ срок кежлӧ. Срокыс абу нин ылын. Таво налог мынтыны тіянлы абу сьӧкыд, таво налог абу уна. Талунсянь жӧ мунӧй мынтыны сійӧс волисполкомъясаныд, прихода-рӧскода кассаясӧ, поштӧвӧй отделенньӧясӧ. Сійӧн ті сетанныд отсӧг уджалысь йӧз государстволы — асланыд государстволы. Сійӧн ті петкӧдланныд, кутшӧма ті лоинныд водзмӧстчысь (активными) йӧзӧн, кутшӧма гӧгӧрвоинныд Сӧвет власьтлысь уджалан сямсӧ.

Эн пӧ.