МӦДА-МӦДЛЫ ОТСАСЯН КОМИТЕТЪЯСӦ БӦРЙЫСЬНЫ ЛӦСЬӦДЧӦЙ!
Декабр 20-ӧд лунсянь миян Коми обласьт пасьта кутас мунны мӧда-мӧдлы отсасян комитетъясӧс ёнмӧдӧм да выль уджалысьясӧс (шленъясӧс) сэтчӧ бӧрйӧм.
Мӧда-мӧдлы отсасян комитетъяс зэв на эськӧ регыдся крестьяналӧн ӧтувтчӧм, да уналаын нин найӧ крепыда сувтісны кок выланыс, уна нин пӧльза вайисны крестьяналы. Сьӧкыд, сьӧд лунъясысь тырыс йӧз нин мездісны мӧда-мӧдлы отсасян комитетъяс: крестьянинлӧн кӧ вӧв кулӧ, отсасян комитет выль вӧв вылӧ сетӧ сьӧм, сотчӧ кӧ керка, бара на комитет отсалӧ; тшыгйӧн кӧ олӧ крестьянин, комитет сетӧ нянь, койдыс кӧ абу — бара на комитет мездӧ. Зэв уна пӧльза вайӧ крестьяналы мӧда-мӧдлы отсасян комитет.
Крестьяна уналаын нин лӧсьӧдалӧмаӧсь мӧда-мӧдлы отсасян комитетъяс да кыдз вермӧны отсалӧны сылы бурджыка уджавнысӧ. Со Межадорын (Сыктыв уездын) став крестьяниныс пырӧмаӧсь комитетас да ставныс ӧтпырйӧ пайсӧ мынтӧмаӧсь; сэні и комитетыс бура уджалӧ: колян воӧ 78 крестьянинлы отсалӧма да ещӧ мельнича стрӧитӧма — мельничаыс 400 пудйӧн суткинас изӧ.
Мукӧдлаын мӧда-мӧдлы отсасян комитетъяс важӧнсянь нин эськӧ уджалӧны, да уджыс омӧля на налӧн тӧдчӧ. Сы вӧсна сэні уна крестьянин на оз тӧд, кутшӧм пӧльза комитетыс вайӧ. Со Волся вӧлӧсьт эськӧ орчча Межадоркӧд (сӧмын костыс 6 верст), коймӧд юкӧныс весиг крестьяна письыс шленас абу на.
Водзӧ кежлӧ тадзитӧ кольны, дерт, оз позь, та вылӧ колӧ ёнджыка видзӧдлыны. РКП-лӧн Центральнӧй Комитетыс со мый шуӧ: колӧ тшӧктыны став партийнӧй организацияяслы 13-ӧд партияса съезд шуӧм серти отсавны мӧда-мӧдлы отсасян комитетъясын уджсӧ нуны.
Сэсся Центральнӧй Комитетса бӧръя пленум шуис: бӧрйысьӧм дырйи колӧ тшӧтш паськӧдны йӧз костын петкӧдлӧм мӧда-мӧдлы отсасян комитетлысь крестьянинлы пӧльза вайӧмсӧ, важ комитетса шленъяслысь уджсӧ видлавны, мед став крестьянаыс аддзасны, кутшӧм бур вайӧ комитетыс. Кӧні комитетъяс эз вӧвны, сэні колӧ лӧсьӧдны, да тайӧ уджсӧ колӧ сідзи нуны, мед эськӧ пырӧмыс комитетас вӧлі ас окотаӧн. Омӧля кӧ уджаліс комитет, уджалысьяссӧ колӧ вежны. Кодлы обществоыс ёнджыка веритчӧ, сійӧс и колӧ уджалысяс пуктыны.
РКП-лӧн Центральнӧй Комитетыс шуӧ: мед крестьяна асьныс бӧръясны уджалысьяссӧ, некутшӧм личкӧм, тшӧктӧм вӧчны оз позь, сӧмын мед комитетъясӧ сюрӧны уджалысь йӧз.
РКП-лӧн Центральнӧй Комитетса тшӧктӧмъяс кузя кӧ сиктъясын мӧда-мӧдлы отсасян комитетъяс уджсӧ нуӧдасны, сэки комитетъяс ёнмасны да крестьяна ставныс пырасны сэтчӧ.
Н. К.
