ЛӦСЬӦДӦЙ, КОМИ ЙӦЗ, РАДИОМу пиӧ пыдӧ зэв пырис Эмбурсӧ корсигӧн морт; Му вывсӧ ас ногыс вӧчӧ; Сынӧдӧд выліті Лэбалӧ повтӧг; Гӧгӧрбок тӧдмалӧ, Кокньӧдӧ олӧмсӧ ассьыс, Ас киас ас кинас, вежӧрнас Ставсӧ морт надзӧник босьтӧ; Водзӧ век велӧдчӧ, Ёнджыка сюсьмӧ. Дедъясным, батьясным Овлісны пемыдын. Сы понда найӧлы Овнысӧ сьӧкыдджык вӧлі, Гӧгӧрбок олӧмыс Нартитліс найӧӧс. Эз найӧ лючкиа тӧдлыны Мукӧд йӧзыслысь олӧмсӧ — Пемыдысь петны эз вермывны, Сӧмын нин дыр мысти Коркӧ да кодъяскӧ Паськыдін олӧмсӧ кывлісны. Водзӧ век олӧмыд кыссьӧ, Содӧ да сюсьмӧ вежӧрыс мортлӧн. Надзӧник морт вермис лӧсьӧдны, Кыдзи регыдӧн позьӧ Кывны да тӧдмавны, Кытӧн мый керсьӧ, кытӧн мый вӧчӧны, Кыдз саридзьяс сайын, уна му сайын, ылын Олӧны йӧзыс, Кыдз найӧ мырсьӧны Кокньӧдсӧ корсигӧн. Гыясӧн сынӧдӧд Сёрнитан шыяс Локтӧны пельӧдзыд Матысь и ылысь — быдлаысь. Гыяссӧ сынӧдсьыс Куталӧ-кыялӧ Морт киӧн, вежӧрӧн лӧсьӧдӧм Ичӧтик машина. Мӧд разӧдан машина Разӧдӧ гӧгӧр быдлаӧ Шыалан гыяссӧ, Кывзан машина Куталӧ наясӧс, Пельӧдзыд вайӧ, Висьталӧ сійӧ жӧ, сідзи жӧ, Мый коді шуӧма Разӧданінсянь Морт сёрни шыӧн. Шыасьысь ылісянь шыасьӧ, Машина разӧдӧ гыяс, Сынӧдӧд, ва вывті моз жӧ, Найӧ мунӧны гӧгӧр: Быд сиктӧд, быдлаті, Кӧні мортыс абу кӧть эм. Сійӧ гыяслы мунтӧмин абу — Быдлаті дзик найӧ мунӧны, Сибдывтӧг, веськыда, регыдӧн зэв. Со кутшӧм бур Морт лӧсьӧдіс аслыс! Со кутшӧм дивӧ кодь тор Морт сямӧн артмӧма! «Радио» — роч кывйӧн шусьӧ Сэтшӧм бур коланторйыс, «Радио» — веськыда, югӧр моз мунысь, Ним сылы пуктӧма. «Радио» — пемыдӧс югдӧдысь, Сьӧкыд олӧмын отсалысь. «Радио» — Ленинлӧн индӧмтор, Быд сиктын быд мортлы колантор. «Радио» — югыдлань нуӧдысь, Быдлаӧ велӧдысь-индалысь. Со кутшӧм «радио» вына! Видзӧдлӧй, коми йӧз, гӧгӧрбок, Кыдзи ті, кутшӧма оланныд: Пемыд на Коми му ёна. Уна на бырӧдны ковмас Сьӧд-пемыдлуннымӧс миян. Ёна на мырсьыны ковмас Бур-югыдлань мунігас. Вынаджык, коми йӧз, босьтчӧй Ӧтвылысь пемыдсӧ бырӧдны, Чорыда сувтӧй пемыдлы паныд, Ёнджыка восьлалӧй югыдлань: Босьтчӧй лӧсьӧдны аслыныд Быд сиктын радио! Сувтӧдӧй сійӧс быдлаын, Эн кольччӧй мукӧдысь — Зэв озырлун сэтчӧ оз ков. Лӧсьӧдӧй, коми йӧз, радио, Кывзӧй быдсяма юӧръяс! Оз ков вунӧдны Ленинлысь тшӧктӧмсӧ — Лӧсьӧдӧй радио! А. А. П.
