ГӦТРАСЬӦМ ЙЫЛЫСЬ ДА СЕМЬЯӦН ОЛӦМ ЙЫЛЫСЬ
Гижӧй ставныд, кыдзи лӧсьӧдны выль закон!
Центральнӧй Исполнительнӧй Комитетлӧн 2-ӧд сессия вылын юстиция комиссар Курскӧй ёрт висьталіс доклад гӧтрасьӧм йылысь да семья пытшкын олӧм йылысь выль закон чукӧр серти (проект). Сессия сэки шуис: юстиция комиссариатлы пӧ колӧ выль законсӧ лэдзтӧдз войдӧр ёна сійӧс быд боксянь видлавны да юавны, мый шуӧны выль закон йылысь уджалысь йӧз. Юстиция комиссариатын ӧні та йылысь мунӧ дискуссия, споруйтӧны, колӧ оз пӧ гӧтрасьӧмсӧ гижавны, гашкӧ, позьӧ гижӧдчӧмсӧ шыбитны.
Быд крестьянскӧй газетын гӧтрасьӧм йылысь ӧні мунӧ сёрни. Ми думайтам, миянлы «Коми Сиктын» позьӧ жӧ та йылысь кыпӧдны сёрни.
Коми уджалысь йӧз, коми крестьяна, гижӧй ставныд, кыті-мый ӧнія законыс гӧтрасьӧм йылысь да семья йылысь тіянлы оз кажитчы. Миян ногӧн, позьӧ гижны та йылысь зэв уна.
Уналаын на миян коми нывъяс да том дӧваяс думайтӧны: закон пӧ нывбабаяс дор сулалӧ, повны пӧ оз ков — дитя кӧ лоӧ, батьыс вердас. Мукӧдлаын бара дитя вылӧ видзӧдӧны нажӧтка вылӧ моз жӧ: колӧ пӧ аддзыны озырджык зонмӧс либӧ мужикӧс, мед колӧкӧ унджык мынтас дитя вердӧм вылӧ. Нывъяс пиын сэсся эмӧсь и сэтшӧм йӧз, кодъяс зэв кокньыда сетчӧны зонъяслы, найӧ думайтӧны, оз кӧ пӧ зонмыс гӧтрась, судӧн пӧ тшӧкта мынтыны дон дитя вердӧм вылӧ. Сідз миян коми сиктъясын гӧтрасьӧм вылӧ видзӧдӧны, сы вӧсна народнӧй судъяс тырӧмаӧсь делӧясӧн содержанньӧ йылысь (алиментъяс йылысь) да батьясӧс тӧдмалӧм йылысь.
Сэсся кӧть, шуам, суд нывбаба дор сувтас, шуам, тшӧктас батьсӧ вердны дитясӧ да сетас исполнительнӧй лист мамыслы.
Мый эськӧ ті думайтанныд — сійӧн и помасьӧ нывъяслӧн виччысьӧмъяс. Исполнительнӧй лист эськӧ киын да, мый сы вӧсна пӧльзаыс. Сӧмын шоч нывбаба суд шуӧм кузя босьтӧ батьсяньыс дон дитя вердӧм вылӧ. Уна нин батьыс во чӧжӧн мынтас, мукӧдыс мынтӧны суд шуӧм кузя сӧмын куим-нёль тӧлысь. Волас эськӧ милиция, опись вӧчас, да бара на сідз ставыс кольӧ.
Ӧнія законас сэсся вӧлі статья (142 ст.): ныв кӧ олӧма уна зонъяскӧд, став зонмыс мынтӧны дон дитя вердӧм вылӧ. Сы вӧсна овлӧ и сідз: зонмыс эськӧ абу и мыжа, да тшӧтш лоӧ сылы мынтыны.
Колӧ та йылысь сиктъясын скодъяс вылын крестьяналы сёрнитны, мед эськӧ выль закон гӧтрасьӧм йылысь да семья йылысь вӧлі лӧсьыд, мед законыс вермис эськӧ дорйыны уджалысь йӧзсӧ.
Быдлаын нуӧ та йылысь сёрни! Быдӧн гижӧй газетӧ!
Н. К.
