СУДЗӦДӦЙ «КОМИ СИКТ»!

Конкурсӧн сюямӧ крестьяна пӧвстӧ унджык газет

Миян коми крестьяналӧн уна на зэв омӧльыс олӧмас дай уджас. Вывті на уна вын весьшӧрӧ вошӧ коми крестьяналӧн уджавнысӧ кужтӧмла, бур олан сямсӧ тӧдтӧмла. Ёна на колӧ велӧдчыны коми крестьяналы, медым бурджыка овмӧссӧ кыпӧдны, олӧмсӧ лӧсьӧдны.

Ён отсӧг крестьяналы сетӧны газетъяс. Газетъяс отсалӧны налы быд боксянь: югдӧдчыны, овмӧс кыпӧдны, бурджыка уджавны, долыдджыка овны. Газетъяс тӧдмӧдӧны крестьянаӧс быдторнас.

СССР пасьта эм уна дзик крестьяналӧн газет. Эм жӧ и миян коми крестьяналӧн асланыс газет «Коми Сикт». Лӧсьӧдӧма таво тулыссянь. Сӧмын «Коми Сикт» ёна на этша петӧ. Крестьяна унджыкыс на абу тӧдсаӧсь «Коми Сиктӧн», унджыкыс на оз лыддьыны сійӧс. Доныс эськӧ абу и ыджыд, сӧмын 15 ур тӧлысьнас, 80 ур — квайт тӧлысь кежлӧ ӧтпырйӧ судзӧдӧмӧн, 1 шайт 50 ур во кежлӧ.

Мед кӧть мый, быд мортлы колӧ сюйны «Коми Сикт» крестьяна пӧвстӧ! Мед кӧть мый, быд коми крестьянинлы колӧ лыддьыны «Коми Сикт», колӧ судзӧдны сійӧс аслыс.

«Коми Сикт» крестьяна пӧвстӧ сюйӧм вӧсна «Югыд Туй» газетлӧн редакцияыс восьтіс декабр 15-ӧд лунсянь куим тӧлысь кежлӧ конкурс (венласьӧм, коді мыйта вермас чукӧртны крестьянаӧс газет судзӧдӧм вылӧ). Конкурссӧ восьтӧма кыкнан газет вылас. Медъёнасӧ тайӧ конкурснас ми зілям содтыны «Коми Сиктлысь» лыдсӧ. Медвойдӧр колӧ сюйны крестьяна пӧвстӧ «Коми Сикт», сэсся вӧлисти «Югыд Туй».

Конкурс вылӧ лӧсьӧдӧма премияяс: тӧлӧдчан машина, кык плуг, роч ной пиджак да гач тыр, сапӧг, крестьянскӧй библиотека, сідз водзӧ. Коді вермас чукӧртны мыйта колӧ газет судзӧдысьясӧс медвойдӧр, сылы и сетсяс премия^Видзӧд «Югыд Туй» 242-ӧд да 245-ӧд №№-яс./^.

Кыдзи сиктъясын нуӧдны тайӧ конкурссӧ? Кутшӧмкӧ окочӧй мортлы колӧ заводитчыны чукӧртны крестьяна пӧвстын газет вылӧ гижсьыны окотитысьясӧс да мыйкӧ дыра мысти (вежон либӧ кык мысти) ыстыны чукӧртӧм сьӧмсӧ редакцияӧ, юӧртны тшӧтш: тайӧ пӧ конкурс вылӧ. Сэсся водзӧ чукӧртны мыйкӧ мында газет судзӧдысьясӧс да бара ыстыны редакцияӧ. Пыр сідзи нуӧдны уджсӧ, кытчӧдз оз тыр нормаыс премиясӧ воӧм вылас.

Позьӧ сэсся премиятӧ воны мӧд ногӧн. Крестьяна скод вылын сёрнитны та йылысь да шуны судзӧдны «Коми Сикт» ӧтув став сиктыслы мыйкӧ мында. Вермас кӧ сиктыс скод шуӧм серти судзӧдны «Коми Сиктсӧ» 100-ӧс во кежлӧ, воас тӧлӧдчан машина. Тӧлӧдчан машинанас сэсся став сиктса крестьянаыслы позьӧ пӧльзуйтчыны.

Сӧмын колӧ тэрмасьны чукӧртны судзӧдысьяссӧ газеттӧ, медым удитан премиясӧ воны, мед мӧд морт оз удит воны.

Партийнӧй ёртъяс, комсомолечьяс, профсоюзса шленъяс, учительяс, агрономъяс, селькоръяс, быд водзмӧстчысь крестьянин — быдӧн конкурсӧн зільӧй сюйны унджык «Коми Сикт» крестьяна пӧвстӧ!