СЕЛЬСКОКӦЗЯЙСТВЕННӦЙ НАЛОГ 1926−27 ВО ВЫЛӦ

Колян № 34-ӧд «Коми Сиктын» ми гижлім нин: Финанс Комиссариат лӧсьӧдӧ выль закон сельскокӧзяйственнӧй налог йылысь. Ӧні видзӧдлам неуна законыслысь проектсӧ.

Таво да колян воясӧ налогсӧ босьтлісны пашня, видз да скӧт серти. Видзьяссӧ да скӧтсӧ пӧртлісны ставсӧ пашня вылӧ да пашняяссянь и лыддьылісны налогсӧ. Выль проект серти, налогсӧ кутасны босьтны доход серти: мыйта доход босьтӧ кӧзяйство, сы серти и налог лоӧ.

Сійӧ со кыдзи лӧсьӧдӧма: законын лоӧ индӧма, шуам, Коми обласьтын пӧ ӧти десятина пашня вайӧ 20 шайт доход, мӧс — 8 шайт, вӧв — 12 шайт, видз — 14 шайт. Обисполком тайӧ нормасӧ вермас вежлавны уездъясын да вӧлӧсьтъясын крестьянаӧн доход босьтӧм серти.

Сэсся выль закон кузя кутасны лыддьыны, кутшӧм доход крестьянин босьтӧ прӧмысысь, кутшӧм доход вайӧны сылы ыжъяс, градъяс, чипанъяс да мукӧдторъяс. Тайӧ посни доходъяссӧ арталас вӧлӧсьтувса налогӧвӧй комиссия быд крестьянинлы торйӧн.

Босьтам ӧти крестьянинӧс. Шуам, сылӧн 2 десятина пашня, кык десятина жӧ видз, ӧти мӧс, ӧти вӧв. Доходыс тайясысь воддза шуӧм кузя со кутшӧм лоӧ: кык десятина пашня сетӧны крестьянинлы (2×20) 40 шайт, кык десятина видз вайӧны (2×14) 28 шайт, ӧти мӧс — 8 шайт, ӧти вӧв — 12 шайт, да вӧлӧсьтувса комиссия шуӧма, посни доходъяс пӧ во чӧжӧныс чукӧрмас 30 шайт. Сідзнад став доходыс крестьяниныслӧн лоӧ 118 шайт. Крестьяниныслӧн 3 душ семья.

Законас лоӧ висьталӧма, 118 шайтысь 3 душ дырйи босьтсьӧ (шуам кӧть сідз) 2 урӧн быд шайтысь. Сідзкӧ налогыс тайӧ крестьянинлӧн лоӧ 2 шайт да 36 ур.

Тадзинад зэв кокни лоӧ артавны налогтӧ крестьянинлы.

Гӧль крестьянаяс выль закон кузя дзикӧдз мынӧны налогысь. Кӧсйӧны вӧчны сідз: морт вылӧ кӧ доход кайӧ 30 чӧлкӧвӧйысь этша, налог оз босьтсьы. Думайтӧны сідз мездыны налогысь 7 миллион крестьянинӧс Союз пасьта.

Со мый шуӧ выль законлӧн проектыс сельскокӧзяйственнӧй налог йылысь. Крестьяна, мӧвпыштӧй та йылысь да гижӧй газетӧ ставныд, кыдзи бурджык лӧсьӧдны налогсӧ.

Н. К.