ПОЖӦГСА ПОТРЕБИТЕЛЬСКӦЙ ОБЩЕСТВОЛӦН ВОЧӦЖСЯ УДЖ

(Кулӧмдін у.)

Потребительскӧй обществолӧн уджыс колян во серти бурмис. Тӧвар колян восянь ёна донтӧммис. Ньӧбӧм дон вылас содтӧдыс вӧлі 14 прӧч. Сэтчӧ жӧ пырӧ доныс тӧвар вайӧмсьыс. Таво шленыс соді 58 морт. На пиысь 28 шленыс нывбаба. Став шленыс ӧні 262 морт.

Паевӧй взноссӧ лӧсьӧдӧма вит шайт. Тыр пайсӧ мынтӧмаӧсь сӧмын 178 шлен на. Паевӧй капиталыс ӧні потребительскӧй обществолӧн 1104 шайт да 50 ур. Основнӧй капиталыс 3264 шайт да 43 ур.

Уджйӧза потребительскӧй общество 6468 шайт да 95 ур. Шленъяслы да кыйсьысьяслы уджӧн сетӧма 14378 шайт да 50 ур дон. Колян вося коляснас вузалан доннас тӧварсӧ потребительскӧй общество ньӧблӧма 61296 шайт да 76 ур дон. Унджыксӧ ньӧблӧмаӧсь Обсоюзысь. Вузалӧма тӧварсӧ 47305 шайт да 86 ур. дон. Пушнина да мукӧдтор крестьяналысь ньӧблӧмаӧсь 20750 шайт да 99 ур дон.

Вося барышыс потребительскӧй лавкалӧн 4964 шайт да 67 ур. Сійӧ барышсӧ шуисны юкны со кыдзи: 40 прӧч. основнӧй капиталӧ, 20 прӧч. лавка улӧ выль керка стрӧитӧм вылӧ, 36 прӧч. юкны шленъяслы пай вылӧ да тӧвар ньӧбӧм вылӧ. Колян сьӧмсӧ шуисны сетны мӧда-мӧдлы отсасян комитетӧ, радио судзӧдӧм вылӧ, йӧзӧс югдӧдан удж вылӧ, «Коми Морт» нима лэбалан машина вылӧ да Помӧсдінса крестьяна том йӧз школа вылӧ.

Потребительскӧй обществолӧн эм ичӧтик библиотека (140 нига). Нигаясыс бурӧсь, ёна лыддьӧны. Судзӧдӧ унакодь газетъяс, журналъяс. «Крестьянскӧй газет» да «Безбожник» разӧдӧ быд сиктӧ.

Эмӧсь на и омӧльторъяс потребительскӧй обществоын.

Эм сылӧн мельнича, сӧмын изкиыс зэв омӧль да, оз вермы бура уджавны. Позьӧ эськӧ вӧлі изкисӧ важӧн нин вежны, да правленньӧыс пыр мыйкӧ виччысьӧ. Сэсся правленньӧ шоча чукӧртавлӧ уполномоченнӧйясӧс собранньӧяс вылӧ, шоча шленъяслы висьтавлывлӧ аслас удж йылысь. Водзӧ кежлӧ тайясӧс колӧ бырӧдны.

Приказчикыс абу судзсьӧма 258 шайт да 3 ур.

Правленньӧлы ӧні колӧ зільны чукӧртны шленъяслысь тырмидз паевӧй взносъяс да уджӧн сеталӧм сьӧм.

Мальӧ Петыр.