***

Миян коми сиктъясын ныв-зон прӧст каднысӧ коллялӧны ёна на лёк ногӧн: войпукъясӧн, ывла вылын дурӧмӧн либӧ лёк сьыланкывъяс сьылӧмӧн. Дерт, тадзисӧ мунӧ, ме думысь, со мый понда: ӧти-кӧ, коми сиктъясыд миян ёна на пемыдӧсь, важ олан сямыслӧн вужъясыс ёна на зэлыдӧсь; мӧд-кӧ, выль оласногас туйдӧдысьясыс этша на, оз на тырмыны быдлаӧ; коймӧд‐кӧ, сиктъясын зэв на этша тӧдӧны коми сьыланкывъяссӧ, дай сэтшӧм нигаясыс на шоча разалӧма.

Торъя пемыда миян олӧны коми аньяс — нывъяс, нывбабаяс. Найӧ важ оласногсьыс зэв на векньыдика воськовтісны водзӧсӧ — выльланьыс. Сӧмын бӧръявылыс кӧнсюрӧ кутіс муртса тӧдчыны налӧн водзмӧстчӧмыс-садьмӧмыс. Колӧ эськӧ кыдзкӧ регыдджыкӧн найӧс кыпӧдны ӧтвыйӧдз мужикуловкӧд, велӧдны-туйдӧдны петны важ лёк оласногсьыс да сувтны выль бур олӧм лӧсьӧдны.

Велӧдны позьӧ уна ногӧн: сёрниясӧн, лекцияясӧн, митингъясӧн, собранньӧясӧн, спектакъясӧн, ворсӧмъясӧн, сьылӧмъясӧн. Ме чайта, сьылӧмыд медъёна сьӧлӧмӧ йиджас дай сыысь йӧзыд оз дӧзмыны. Сійӧн ме тайӧ «Ӧксиньсӧ» и гижи, тані ставыс мунӧ сьылӧмӧн.

Тайӧ быдлаын позьӧ нуӧдны: нардомын, клубын, войпуканінъясын, ывла вылын — кӧн окота. Ме ногӧн, тайӧ абу сьӧкыд, тані унджыкыс тӧдса коми сьыланкывъяс, тӧдса сьыланногъясыс и (мотивъясыс). Вӧчны позьӧ тадзи: нывъяс-зонъяс лючки пуксялӧны ӧтчукӧрӧджык (сцена вылын позьӧ и сулалӧмӧн нуӧдны), кутшӧмкӧ мичаджык гӧлӧса нылӧс бӧрйыны «Ӧксиньӧ» (сылы ковмас унаысь ӧтнаслы сьывны) — дай босьтчӧны сьывны. «Ӧксинь» йылысь висьталӧмыс (основной мотив) сьывсьӧ «Как родная меня мать провожала» моз (позьӧ, дерт, и мӧд ногӧн); мукӧд сьыланкывъясыслӧн асланыс ногыс (индалӧма). Сьылігӧн оз ков лёк ногӧн горзыны, колӧ сьывны лючки, мичаа.

Тайӧ ичӧтик уджӧй кӧ менам сетыштас кутшӧмкӧ пӧльзатор коми аньяслы — меным зэв ыджыд нимкодясьӧм сійӧ лоас.