ВАЙӦЙ КЕР ЛЭДЗАНІНЪЯСӦ ГАЗЕТ

Эжва кузя, Сыктыв кузя миян крестьяна — том и пӧрысь — тӧвнас ставныс мунӧны вӧрӧ кер (сортовка) лэдзны: лым пиын, кӧдзыд тӧвся поводдяӧ лоӧ мырсьыны кер лэдзысьяслы. Сӧмын вӧрас югдыштас, кер лэдзысьяс чеччӧмаӧсь нин, кылӧ нин вӧр кузя ылӧ-ылӧ чер шыыс. Пемыдӧдзыс лоӧ уджавны. «Ёна мудзан лунтырнад, — висьталӧ ӧти кер лэдзысь, — воан узьланінад (вӧр керкаад) да, коскыд висьӧ, кокыд юкалӧ, кырымыд доймӧ. Сьӧкыд миян уджыс».

Узьланінӧ воан да, сёйыштан да пырысьтӧм-пыр водан узьны (том йӧз дыр на пукалӧны, мыйкӧ пыр больгӧны). Тӧвся войыд кузь: шойччан нин, узьыштан нин тырыс, век на вой. Чеччыны водз на — пемыд, керны нинӧм, сэки вот и думыштан, кутшӧм пемыд на миян олӧмыс, кутшӧм сьӧкыд на миян уджыс, мыйта весьшӧрӧ вошӧ миян колан кадыс.

Мыйла нӧ эськӧ узьланінъясӧ оз вайны газетъяс. Коркӧ эськӧ гортад (сиктад) петалігад ачыд ваян да, сӧмын ӧд гортад волӧмыс шоча овлӧ, толысьнад зэв нин ӧтчыд.

Колӧ эськӧ лӧсьӧдны сідзи, мед быд пошта вӧлӧсьтӧ волӧм бӧрын кер лэдзанінъясӧ вайлісны газет. Сійӧс позьӧ вӧчныд. Эм миян союз Всеработземлес, мед сійӧ кыдзкӧ лӧсьӧдас тайӧ уджсӧ. Делянкаяс, кӧні ми уджалам, вӧлӧсьтсяньыд вель ылын — 10−15 верст, эмӧсь ылынджык, сэсся делянкаыд нёль-ӧ-вит ӧти вӧлӧсьтад. Союзыд ӧтнас оз вермы сійӧ уджсӧ нуны, сьӧмыс сылӧн оз тырмы. Та вылӧ ковмас торъя морт. Миян ногӧн, позьӧ тайӧ уджсӧ нуӧдны Северолеслы. Колӧ союзлы договорсӧ кырымавтӧдзыс мӧвпыштны та йылысь да договорас тшӧтш сюйны.

Кер лэдзысьяс.