ВОЛИСПОЛКОМӦ ШЛЕНЪЯССӦ СОДТАСНЫ

Государство пытшкын удж нуӧдысь комиссариат (наркомвнудел) лӧсьӧдӧ проект волисполкомъясӧ шленъяссӧ содтӧм йылысь. Ӧні волисполкомъясын сӧмын куим шлен. Тайӧ проект сертиыс чайтӧны содтыны волисполкомса шленъяссӧ дас ӧтисянь кызь ӧти мортӧдз (вӧлӧсьтувса йӧз лыд серти: кымын уна йӧзыс вӧлӧсьтас, сымын унджык шлен пыртасны волисполкомӧ). Уджавнысӧ волисполкомас кутасны важ моз куим шлен. Куим шленлы жӧ и донсӧ уджалӧмсьыс кутасны мынтыны.

Мыйла нӧ эськӧ содтынысӧ волисполкомса шленъяссӧ? Бара на жӧ сы вӧсна, медым исполкомсӧ, сылысь уджсӧ матыстны йӧз бердӧ, медым Сӧветъясӧс йитны крестьянакӧд. Куим волисполкомса шленыд ӧд тайӧ уджсӧ, кутшӧма колӧ, нуӧдны оз вермыны. Найӧ этшаджык йӧзкӧд вермӧны волысьны, волисполкомас уджалӧм вӧсна шочджыка эштылӧны крестьянакӧд сёрнитны.

Унджык шленсӧ волисполкомас лӧсьӧдӧны крестьянакӧд чорыдджыка ӧтувтчӧм вылӧ. Кымын ӧд уна волисполкомса шленыд, сымын паськыдджыка верман йитны исполкомсӧ крестьянакӧд.

Тайӧ выль бӧрйӧм волисполкомса шленъясыс кутасны чукӧртчывлыны собранньӧяс вылӧ, сёрнитны волисполкомса удж йылысь, индавны сылы уджсӧ. Найӧ пыр кутасны тӧдны, кутшӧм удж нуӧ волисполкомыс, кутасны асланыс сиктса крестьяналы висьтавлыны сы йылысь.

Сэсся найӧ волисполкомса уджсӧ нуӧдӧмӧн вермасны видзӧдны, кутшӧма уджалӧ волисполкомса президиумыс (куим шленыс) дай веськӧдлыны найӧ уджӧн, тшӧктыны уджавны лючки Сӧвет власьт законъясӧн индалӧм серти.