БЫДӦН МЫНТӦЙ СТРАХӦВӦЙ!

Государственнӧй страхованньӧлы быд во оз ставсӧ мынтавны страховкасӧ. Сы вӧсна быд во содӧ страхӧвӧй недоимка. Ӧні тайӧ недоимкаыс зэв нин ыджыд — став Сӧветъяс Союз пасьта — 10 миллион шайт.

Воысь воӧ страхӧвӧйтӧ пыр чинтӧны, этшаджык босьтӧны; сетнысӧ крестьяналы лоӧ воысь воӧ унджык. Сы вӧсна недоимкаыд вермас вӧчны зэв омӧльӧс. Ӧні крестьяналы Госстрах сетӧ сьӧмсӧ пӧшти сымда жӧ, мыйта босьтӧ страхӧвӧйсӧ. Водзӧ кежлӧ кӧ страхӧвӧй недоимкаыс важ моз кутас содны, лоӧ Госстрахлы аслас запаснӧй капиталсьыс сетавны сьӧмсӧ сотчӧм крестьяналы либӧ кодлӧн скӧтыс кулӧ, мукӧд страхуйтӧмторйысь.

Колӧ, кӧть мед мый, зільны чинтыны недоимка лоӧмсӧ, весиг дзикӧдз бырӧдны.

Коді пырӧ недоимка улас? Тайӧ бӧръя кык вонас гӧль крестьянаӧс дзикӧдз мездылісны страхӧвӧй мынтӧмысь. Сідзкӧ гӧль крестьянаыд эз вермыны сюрны недоимка улӧ либӧ сюрины зэв этшаӧн.

Недоимка улӧ шедӧны судзсяна крестьянаяс, кодъяс страхӧвӧйсӧ вермӧны мынтыны, да оз кӧсйыны мынтыны. Татшӧмъясыс лоины, Госстрах эз на сэтшӧм чорыда нуӧд мырдӧн страхӧвӧйсӧ перйӧм уджсӧ да.

Быть страхуйтӧмыд со кыдзи лӧсьӧдӧма. Кутшӧмкӧ кӧ пикӧ крестьяниныд воас (скӧтыс кулӧ, керкаыс сотчас), сылы Госстрахыд сетӧ нин сьӧмсӧ, мыйта воӧ сылы страхуйтӧм сертиыс, кӧть и крестьяниныс эз на удит мынтыны страхӧвӧйсӧ. Сідзкӧ татшӧм мынтысьтӧм крестьяниныд видзӧдчӧ овны мукӧд кадын мынтысьысь крестьяна тшӧт вылӧ. Сійӧ путкыльтӧ став страхуйтан уджсӧ.

Коді вермӧ мынтыны страхӧвӧйсӧ да оз кӧсйы, ыръянитӧ, нинӧм вӧчтӧг кольны оз позь. Колӧ сэтшӧмъясыскӧд вермасьны. Госстрах кутас перйыны ыръянитысь йӧзлысь страхӧвӧйсӧ мырдӧн, весиг налысь мыйкӧ овмӧссьыс вузалӧмӧн. Колӧ отсавны перйыны страхӧвӧйтӧ волисполкомъяслы, мӧда-мӧдлы отсасян комитетъяслы, селькоръяслы, быд крестьянинлы.

Тавося страхӧвӧй колӧ мынтыны быдӧнлы. Медым ӧти морт эз коль мынтысьтӧг. Тшӧтш мынтыны колӧ кольӧм восяяс страхӧвӧй недоимка.

В. П.