ЧОРЫД ГАДДЯ КИА ЙӦЗӦС ЮГДӦДАМӦЙ!
Кымын пемыдӧсь вӧвліны крестьяна да рабочӧйяс, сарскӧй правительстволы вӧлі сымын бур. Пемыд понда крестьяна да рабочӧйяс оз вӧлі тӧдны, кытісянь локтӧ на вылӧ гӧльлуныс, коді нартитчӧ на вылын. Сы понда жӧ оз вӧлі вермыны сувтны паныд нартитысьяслы да вежны олӧмсӧ ас ногыс. Уна киссис вир да синва, кытчӧдз эз кутны гӧгӧрвоны став омӧль йывсьыс, кытчӧдз рабочӧйяс да крестьяна эз венны ассьыныс нартитысьяссӧ.
Ӧні быдӧн нин гӧгӧрвоӧны пемыдлунлысь омӧльсӧ. Некодлы нин оз ков висьтавны югдӧдчӧмлысь вынсӧ. Сӧмын оз быдӧн ӧткодя босьтчыны югдӧдчан удж вылӧ, оз ӧткодя пуктыны пыдди. Рабочӧй да крестьяна правительстволысь шуӧмсӧ: «Быд уджалысь йӧзлы, быд кухаркалы колӧ тӧдны да кужны тӧлк нуны государствоса уджын, быдӧнлы колӧ зільны нига лыддьыны, медым нигаыс вӧлі уджалысь йӧзлы мӧд югыдджык син кодь».
Мӧвпыштны колӧ пыдӧдзджык нига йылысь, быдӧнлы колӧ пыдди пуктыны Сӧвет правительстволысь шуӧмсӧ. Нига миянӧс велӧдӧ, кыдзи колӧ ас костын олӧм нуны, нига миянӧс велӧдӧ, кыдзи кыпӧдны олӧмсӧ, нига миянлы сетӧ гажа бур олӧм.
Важ сарскӧй закон улын олӧмыс миянлы сетіс гӧрб да чорыд кабыр, эз миянӧс велӧд, кыдзи кокниджыка да бурджыка позьӧ уджавны. Заграничаын, мукӧд странаас уджалӧны машинаӧн, ми уджалам дубинушкаӧн. Ёна быд уджалысь йӧзлы йиджис дубинушкаыд. Колӧ пуктыны сылы пом, колӧ аслыным пуксьыны машина вылӧ да тшӧктыны уджавны ас пыдди.
Сьӧкыд пуксьыны кӧрт вӧв вылӧ, колӧ ёна первой велӧдчыны нига вылысь, колӧ сэсся ёна зільны кӧрт вӧвсӧ вӧчны. Машинатӧг ми огӧ вермӧ кокньӧдны олӧмсӧ, нигатӧг огӧ вермӧ вӧдитчыны машинаӧн.
Кымын миян уна лоӧ машина, кымын ми югдам, сымын огӧ кутӧ повны миянӧс торкӧмысь капиталист государствоясӧн, сымын регыдджык вермасны мездысьны уджалысь йӧзыс мукӧд странаясын капиталистъясысь.
Миян коми йӧз водзын югдӧдчан уджыс ыдждӧ. Колисны кӧ миян роч ёртъяс мукӧд государствоса йӧз серти, ми весиг колим роч йӧз серти. Ӧні колӧ миянлы зільны вӧтӧдны югдӧдчӧмӧн югыдджык йӧзӧс, медым ми эгӧ кутӧ кыссьыны бӧжын. Боксянь тайӧ удж вылӧ миянлы ыджыд отсӧг оз во, колӧ аслыным ёнджыка босьтчыны.
Тайӧ тӧлысьын 15 лунсянь воссьӧ тӧлысь чӧжӧн нигаӧс да газетӧс инӧдӧм сиктъясын. Тайӧ удж бердас колӧ инмӧдчыны быдӧнлы, медъёна югдӧдысь йӧзлы. Сэсся тайӧ уджсӧ колӧ нуны не весиг ӧтик тӧлысьӧн, нюжӧдны пемыдлунсӧ коми йӧзлысь помавтӧдз. Чорыд гаддя киа коми йӧзлы колӧ мунны паныд да писькӧдны налы паськыд гажа туйсӧ. Югдӧдысь, эн пукты кисьыд нигатӧ, кытчӧдз оз кут корны сійӧс миян коми крестьянин, кытчӧдз сытӧг няньтӧг моз оз кут вермыны овны.
