КРЕСТЬЯНА ПИСЬМӦЯС КУЗЯ

Мыйла сельскокӧзяйственнӧй налог выль ногӧн босьтны кӧсйӧны

Ставсоюзса Сӧветъяслӧн коймӧд съезд вылын вӧлі шуӧма: сельскокӧзяйственнӧй налог пӧ колӧ босьтны крестьяна доход серти, да тшӧктӧма сэки жӧ вӧлі финанс комиссариатлы водзвыв лӧсьӧдны 1926−27 вося сельскокӧзяйственнӧй налог закон йылысь проект да тӧдмӧдны сійӧн крестьянаӧс.

Финанс комиссариатын вӧлі лӧсьӧдӧма комиссия, сійӧ видлаліс крестьяналысь письмӧяссӧ налог йылысь да письмӧяс кузяыс лӧсьӧдіс проект выль закон йылысь.

Крестьяналӧн письмӧясыс финанс комиссариатӧ вӧлӧм воӧны вель уна. Крестьяна гижӧны: таво кӧть пӧ налог ёна чинтісны, гӧлиник крестьяналы ёна на сьӧкыд мынтыны, колӧ пӧ чинтыштны налогсӧ. Мӧд-кӧ, налог оз ӧткодя босьтсьы — уна доход озырджык крестьяналӧн налог улӧ оз сюр, гӧлиник крестьяналысь абусьыс налог кыскӧны. Коймӧд-кӧ — налог йылысь законыс зэв сьӧкыда гӧгӧрвоана крестьяналы. Сӧмын шоч крестьянин кужас ачыс ассьыс налогсӧ артавны.

Ӧти крестьянин гижӧ: налог пӧ лыддьӧны ставкаяс да разрядъяс серти. Сӧмын пӧ ёна нин грамотнӧй морт кужас ставкаяссӧ да разрядъяссӧ гӧгӧрвоны. Колӧ пӧ веськыда шуны: тэ кӧ кӧдзан ӧти десятина нянь, мынтан, шуам, ӧти шайт, кык десятина кӧ — кык шайт, сідз водзӧ.

Сэсся уна крестьяна гижӧны: льготаяс кӧть пӧ и сетсьӧны гӧлиник крестьяналы, налогыс ыджыд на — гӧль крестьянин оз на вермы мынтыны налогсӧ, оз кӧ мыйкӧ сылы колантор вузав. Колӧ гӧлиник крестьянасӧ дзикӧдз мездыны налог мынтӧмсьыс.

1926−27 вося сельскокӧзяйственнӧй налог йылысь законсӧ кӧсйӧны лӧсьӧдны крестьяна шуӧмъяс кузя. Регыд финанс комиссариат йӧзӧдас проект закон сельскокӧзяйственнӧй налог йылысь 1926−27 во вылӧ, мед эськӧ став крестьянаыс тӧдісны, кыдзи кӧсйӧны локтан воӧ босьтны налогсӧ, мед эськӧ крестьянаыс вермасны водзвыв висьтавны, мый выль законыс налы оз кажитчы, кыті-мый колӧ вежны, мый законас колӧ содтыны. Сідзкӧ крестьяна асьныс лӧсьӧдасны налог йылысь законсӧ. Сӧмын колӧ унджык крестьяналы гижны ассьыс думъяссӧ налог йывсьыс.

Миян Коми обласьтын крестьяна шуасьлӧны скодъяс вылын: налог пӧ ыджыд да сьӧкыд, льготаяс пӧ нелючки сеталӧны, нелючки пӧ лыддьӧны крестьяналысь доходсӧ. Шуасьӧм дорсьыд бурджык гижны газетъясӧ. Сэки финанс комиссариат аддзас да крестьяна шуӧм серти лӧсьӧдас налогсӧ. Письмӧяс позьӧ гижны крестьянскӧй газетъясӧ: «Беднотаӧ», «Крестьянскӧй газетаӧ» да «Коми сиктӧ» тшӧтш.

Гижӧй ставныд — мый колӧ вежны налог законас, кыдзи колӧ лӧсьӧдны выль закон!

Н. К.