БЫРӦДАМ ЛОТАЙТЫСЬЯСӦС

Кыдзи вермасьны кооперативысь эмбур лотайтӧмкӧд

Кооперативысь эмбурсӧ лотайтӧмкӧд вермасьны медъёна позьӧ судъяс пыр. Судъяслы сы вӧсна колӧ регыдджык, нюжӧдтӧг видлавны кооперативса эмбур лотайтысьясыслысь делӧяссӧ дай чорыда найӧс мыждыны. Ӧткымынлаын кооперативса шленъясыс кооперативсьыс гусясьысьяссӧ, лотайтысьяссӧ видыштасны, сэсся и прӧститасны. Тадзи вӧчны, дерт, оз ков. Быд лотайтысьӧс, кӧть сійӧ и эз уна видз сьӧмсӧ-тӧварсӧ, колӧ мыждыны, кыскыны судӧ.

Сэсся та кындзи колӧ зільны кооперативын уджсӧ сувтӧдны сідзи, медым лотайтны эмбурсӧ оз вермыны, кӧть и эськӧ и кӧсйӧны вӧлі уджалысьясыс, кӧть и кинысӧ йӧз эмбур вылӧ радейтӧны нюжйӧдлыны. Та вӧсна колӧ ёнмӧдны уджсӧ кооперативса ревизионнӧй комиссиялысь. Ревизионнӧй комиссиялы колӧ тшӧкыдджыка видлавны кооперативса правленньӧлысь уджсӧ; тӧдмавны казначейыслысь, приказчикыслысь уджалӧмсӧ, бурджыка да тшӧкыдджыка видлавны кассасӧ, тӧваръяссӧ. Зэв ёна колӧ ревизионнӧй комиссиялы видзӧдны тшӧт нуӧдӧм вылас: медым сійӧс абу вӧлі дзугӧма, абу торкалӧма. Омӧля кӧ ӧд кооперативад тшӧт нуӧдӧм уджтӧ сувтӧдӧма, медрегыд да медкокни сэки кооперативтӧ гусявлыны-лотайтны.

Кооперативъяс союзса инструкторъяслӧн мог — тшӧкыдджыка волывлыны посни кооперативъясӧ, индавны налы, кыдзи колӧ уджавны, бура тӧдмасьны уджнас, тшӧктыны ёнджыка уджсӧ паськӧдны ревизионнӧй комиссияяслы, чуйдӧдны налысь уджсӧ.

Кооперативса правленньӧ аслас уджнас мыжа кооперативса шленъяс водзын. Медым правленньӧ весиг ӧти здук кежлӧ эз вунӧдчыв сійӧ мыжсьыс, кооперативса шленъяслы колӧ тшӧктыны тшӧкыдджыка вӧчавлыны правленньӧыслы докладъяс аслас удж йывсьыс.

Медбӧрын, быд кооперативса шленлы колӧ матысмыны кооперативса удж бердас, видзӧдны, лючки-ӧ сійӧ уджалӧ, да аддзан кӧ кутшӧмкӧ нелючкиӧн уджалӧм, ревизионнӧй комиссия пыр вештыны, бырӧдны сійӧс.

Со кыдзи колӧ вермасьны кооперативса эмбур лотайтысьяскӧд. Со кыдзи колӧ уджавны кооперативлы, медым сылӧн лотайтӧмыс эз ло.

А. Черницкӧй.