МЫНТӦЙ СЕЛЬХОЗНАЛОГ!

Медводдза мынтан срокыс — январ 1-ӧд лун

Абу нин ылын тавося сельхозналог медводдза мынтан срокыс. Медводдза сроксӧ таво миян обласьтын лӧсьӧдӧма январ 1-ӧд лун.

Крестьяналы таво кольӧм восяяс серти сельхозналог мынтӧмсӧ ёна кокньӧдӧма. Медвойдӧр, тавося сельхозналог кольӧм вося дорысь этшаджык — чинтӧма 40 прӧчент гӧгӧр. Гӧрдармееч семьяяслы, гӧль овмӧса крестьяналы сетӧма гырысьджык кокньӧдъяс.

Окладнӧй листъяс таво крестьяналы сетӧма кадын. Крестьяна срокӧдзыс ёна водз тӧдісны, мыйта налы колӧ мынтыны налогсӧ, сы серти сэсся и лӧсьӧдны сьӧмсӧ. Медым крестьяналы эськӧ матынджык вӧлі норасьны, нелючки кӧ овмӧс сертиыс сылы пуктӧма налогсӧ, лӧсьӧдӧма таво налогӧвӧй комиссияяссӧ уездъясӧ пыдди вӧлӧсьтъясӧ. Комиссияясӧ шленъясӧн пуктӧма тшӧтш крестьянаӧс. Норасьнысӧ кадсӧ сетӧма тырмидз. Ӧні норасьӧмъяссӧ быд крестьянинлысь нин налогӧвӧй комиссияяс удитісны видлавны.

Колян вося серти налог мынтан сроксӧ сёрӧнджык лӧсьӧдӧма дай куим срок пуктӧма. Сэсся тшӧктӧма срокъяссӧ не вештавны. Сроксӧ сёрӧнджык лӧсьӧдӧма сы вӧсна, медым крестьяна кокниджыка эськӧ вермисны корсьны сьӧмсӧ налог мынтӧм вылас.

Ыджыд кокньӧд сетӧма налогсӧ мынтанінъяс боксянь. Позьӧ налогтӧ мынтыны волисполкомъясӧ, поштаяс вылӧ, сьӧм чӧжан кассаяс пыр. Тайӧс лӧсьӧдӧма сы вӧсна, медым крестьяналы налогсӧ мынтыны оз ков вӧлі ылӧ ветлыны. Сэсся позьӧ мынтыны артельӧн уполномоченнӧйяс пыр. Налог позьӧ мынтыны 1-ӧд крестьяналысь воана заём облигацияясӧн.

Со кутшӧм кокньӧдъяс Сӧвет правительство сетіс таво крестьяналы сельхозналог мынтӧм уджын.

Медводдза срок кежлӧ, январ 1-ӧд лун кежлӧ, колӧ мынтыны 40% (быд 1 шайт вылӧ 40 ур) став сельхозналогсьыс.

Коми крестьяна! Абу нин ылын медводдза срокыс сельхозналогтӧ мынтыны. Ті тӧданныд бура, мый вӧсна босьтӧ налогтӧ Сӧвет власьт, тӧданныд, мыйла лӧсьӧдӧма срокъяс. Мынтӧй срок кежлӧ!

Эн пӧ.