НЁЛЬӦД ЁГОРЕЙ ЯРМАНГА

Декабрын 9-ӧд лунын воссьӧ Сыктывкарын Ёгорей ярманга

Воысь воӧ ярмангаяслӧн уджыс кутіс Сӧвет Союз пасьта паськавны да гырсявны. Неважӧн вӧліны ярмангаяс Нижньӧй Новгородын, Свердловскын (Екатеринбургын), мукӧдлаын. Позьӧ вӧлі эськӧ шуны: мый пӧ ӧні ярмангаяссьыс? Миян ӧні эмӧсь кооперативъяс. Сэсся государстволӧн тӧргуйтӧмыс паськалӧ. Абу-ӧ ярмангаясыс бокӧвӧй миян сӧветскӧй кӧзяйстволы? Августын 1 лунын воссис Нижегородскӧй ярманга нёльӧдысь нин Сӧвет власьт дырйи. Сійӧ ярмангаыс пыр на миянлы висьталіс ассьыс бурсӧ. Кыптӧ оборотыс, кыптӧ и лыдыс ньӧбасьысьяслӧн да вузасьысьяслӧн. Локтӧны сэтчӧ оз сӧмын Союз пасьтаысь, локтӧны мукӧд асыввыв странаысь: Персияысь, Асъявыв Китайысь, Афганистанысь, Монголияысь да Турцияысь.

Сэтшӧм ярмангаясыс и эм нин ӧти ногӧн карӧс да сиктӧс ӧтувтӧдӧны. Сэтчӧ локтӧ крестьянин ас эмбурнас, локтӧ и сӧветскӧй купеч карса тӧварӧн, весиг, босьтам кӧ Нижегородскӧй ярмангатӧ, локтӧ и асыввылысь бокӧвӧй купеч. Тані мунӧ прамӧй «йитӧд» карса кӧзяйстволӧн деревнясакӧд, миян союзнӧй кӧзяйстволӧн асыввывса странаясыскӧд.

Дерт, миян ярмангатӧ оз позь ӧткодя пуктыны Нижегородскӧйкӧд. Сэні оборотыс лыддьысьӧ миллионъясӧн. Сэтчӧ локтӧны Союз пасьтаысь дай мукӧд странаысь. Миян Ёгорей ярманга вылӧ волывлӧны бокӧвӧйясыд этша. Но коланлуныс (значенньӧыс) Ёгорей ярмангалӧн миян обласьтлы сэтшӧм жӧ, кутшӧм Нижегородскӧй ярмангаыс став Союзлы.

Ёгорей ярмангаыд важӧнсянь нин мунӧ. Сӧмын эз ӧткодь вӧвлывлы. Важӧн ярманга вылын сӧмын вӧлі нартитӧны мужиктӧ паськыд купечьяс.

Мыйкӧ кӧ крестьяниныд либӧ прӧмышленникыд кутас вузавны, донсӧ купечыд сетас мыйта сьӧлӧм вылас лэптас. Мукӧддырйиыс купечьясыд ас костаныс ӧтувтчӧмӧн донсӧ чинтӧны нарошнӧ, мед унджык кольӧ крестьяниныдлӧн грӧшыс найӧ зептын. Мыйкӧ кӧ ньӧбны кутас мужикыд купечыдлысь, сэки донсӧ содтӧны сэтшӧм жӧ могысь.

Нёльӧдысь нин мунас ярмангаыд выль ног. Ӧні ньӧбалысьясыс да вузалысьясыс — крестьяна, кооперативъяс да государствоса тӧрговля. Абу нин важ моз ӧтка купечьяс. Сэсся та кындзи государствоыс ачыс донсӧ пуктӧ крестьяналы колан тӧвар вылӧ дай видзӧдӧ, оз-ӧ кодкӧ мӧд ног вӧч, лэпты донсӧ.

Кымын миян кӧзяйствоным кыптӧ, сымын кыптӧ миян ярманга, сымын унджык локтӧны ярманга вылӧ крестьяна, унджык тӧварӧн петӧны кооперативъяс да государствоса тӧрговля. Кольӧм вося ярмангаӧс оз позь ӧткодявны воддза вося ярмангакӧд. Тавося ярманга колӧ нуны паськыдджыка кольӧм вося дорысь.

Зільӧй быдсӧн, мед таво Ёгорей ярманга паськалас, кыдзи паськалӧ ярмангаяс мукӧдлаын.