ЛӦСЬӦДӦЙ РЫТ ПУКАЛАНІНЫН КОЛАН УДЖ

Коми му пасьта, мыйӧн помасяс гожся да арся уджъяс, мужикъяс кутчысьӧны вӧр дорын уджавны. Гортӧ кольӧны сӧмын пӧрысь бабаяс, том нывъяс да том зонъяс. Кузь тӧвсёв рытъяс нывъяс колльӧны печкан сайын.

Нывъяс печкигӧн сьылӧны быдсяма сьыланкывъяссӧ: роч дай коми, важдырся дай выльдырся. Сӧмын омӧля на да этша на тӧдӧны Савинлысь да мукӧд коми гижысьяслысь сьыланкывъяссӧ.

Зонъясыд воласны пукаланінад, да сӧмын дӧзмӧдчӧны, нывъяслысь кудель нетшкӧны да сотӧны.

Оз мӧй нӧ эськӧ позь мыйкӧ бурджыктор сёрнитны да сьывны пукаланінъясын? Дерт, позьӧ. Кӧні эм комсомол ячейка, сэні зэв кокни пукаланінъясын нуӧдны нывбаба пӧвстса удж.

Тадзинад позьӧ нывъясӧс матыстны комсомол удж бердӧ. Позьӧ нывъяссӧ печканнас коравны лыддьысян керкаӧ да сэні торъя вежӧсын найӧкӧд нуӧдны сёрни. Тайӧ уджсӧ медбура вермасны нуӧдны сиктса школаын велӧдысьяс-нывбабаяс.

Быд комсомолечлы да комсомолкалы колӧ та йылысь мӧвпыштны.

Часса Ӧль.